Staršynia Viciebskaj abłasnoj arhanizacyi Partyi BNF Leanid Aŭtuchoŭ abvinavačvajecca na padstavie artykuła 22.9 Kodeksa ab administracyjnych pravaparušeńniach (parušeńnie zakanadaŭstva ab srodkach masavaj infarmacyi).Z adpaviednym administracyjnym pratakołam jon aznajomiŭsia 24 krasavika ŭ Kastryčnickim RUUS Viciebska.
Jak paviedamiŭ Aŭtuchoŭ BiełaPAN, 22 sakavika jon i jaho tavaryš pa partyi Kanstancin Smolikaŭ byli zatrymany pravaachoŭnymi orhanami ŭ viciebskim handlovym centry «Evikom» padčas razdačy naviedvalnikam partyjnaha biuletenia «Mahistrat». Asobniki biuletenia byli kanfiskavany.
«Milicyjaniery nie stali pieraličvać kolkaść kanfiskavanych asobnikaŭ, a spytali nas, kolki ich. My adkazali, što nie viedajem. Paźniej u pratakoł zapisali 1.080, chacia ŭ drukarni ja zamaŭlaŭ usiaho 295 asobnikaŭ, a my ž jašče toje-sioje razdali», — zaŭvažyŭ Aŭtuchoŭ.
Paźniej sud Kastryčnickaha rajona Viciebska pryznaŭ aktyvistaŭ Partyi BNF vinavatymi ŭ parušeńni zakona ab ŚMI za toje, što ŭ biuleteniach utrymlivaŭsia zaklik prychodzić na nie sankcyjanavany ŭładami mitynh 25 sakavika z nahody Dnia Voli.Abodva partyjcy byli asudžany na piać sutak administracyjnaha aryštu. Pry hetym zhodna z rašeńniem suda nakład «Mahistrata» pavinny byli źniščyć.
Adnak, jak vyśvietliłasia, asobniki biuletenia cełyja, a milicyjaniery, pavodle słoŭ Aŭtuchova, nibyta znajšli pieravyšeńnie dapuščalnaha nakładu dla niezarehistravanaha drukavanaha materyjału.Zhodna z zakonam ab ŚMI, rehistracyi padlahajuć vydańni, nakład jakich bolšy za 299 asobnikaŭ.
Lidar abłasnoj arhanizacyi Partyi BNF paviedamiŭ, što data sudovaha pasiadžeńnia pakul nie pryznačana, u sud jaho vyklikajuć pozvaj. Kali pravaparušeńnie budzie dakazana, Aŭtuchovu pahražaje štraf ad 20 da 50 bazavych vieličyń (2—5 młn. rubloŭ). Čaradu administracyjnych pracesaŭ partyjny aktyvist razhladaje jak «nacisk na apazicyju, pieraškody da taho, kab raskazvać ludziam praŭdu».
