Ihar Siečyn — najbližejšy paplečnik prezidenta Pucina, taksama vychadziec ź viarchoŭ KHB. Raniej jon byŭ vice-premjeram, ciapier kiruje «Rośniefťju». Heta amal jak «Hazpram», tolki ŭ naftavaj halinie.Viadoma, «Rośniefť» nie manapalist, ale samy ŭpłyvovy hulec na enierhietyčnym rynku. Pryčym zajmajecca jana nie tolki naftaj, ale i hazam.
Michaił Huceryjeŭ — čałaviek bahaty, ale ranham nižejšy. Nie tak daŭno jon navat šukaŭ prytułku ŭ Brytanii, bo nie syšoŭsia z pucincami j siečyncami, ale situacyju niejak razruliŭ i viarnuŭsia. Zatoje Huceryjeŭ maje daŭnija i blizkija kantakty z Alaksandram Łukašenkam. Jon pracavaŭ na Mazyrskim naftapierapracoŭčym i atrymaŭ kancesiju na zdabyču kalijnych solaŭ na novym radoviščy. Kali Łukašenka na adnoj z pres-kanfierencyj raskazaŭ ab karupcyjnych prapanovach aliharcha «Mišy», mnohija padumali mienavita pra jaho.
Što pryviało Siečyna j Huceryjeva ŭ Minsk ciapier?Pakul jość tolki aficyjnaja infarmacyja ahienctva BiełTA. Voś jana.
«Dla raźvićcia supracoŭnictva Biełarusi z AAT NK «Rośśniefť» i AAT NK «RussNiefť» niama absalutna nijakich pieraškodaŭ», — zajaviŭ Alaksandr Łukašenka 16 maja padčas sustrečy ŭ Minsku z prezidentami hetych kampanij Iharam Siečynym i Michaiłam Huceryjevym.
Biełaruski bok, adznačyŭ Łukašenka, hatovy abmierkavać pytańnie ab pašyreńni abjomaŭ pastaŭki nafty j hazu. «Kali, dapuścim, umovy buduć narmalnyja, lepšyja, čym u inšych kampanij, to my možam uziać bolšuju kolkaść nafty na pierapracoŭku pry vašym, viadoma ž, žadańni. Tut u nas prablem nijakich niama», — skazaŭ jon.
«Što datyčyć pastavak naftapraduktaŭ, kali łaska, davajcie budziem damaŭlacca razam, u nas taksama tut nijakich pieraškod niama. Našy naftapierapracoŭčyja zavody vy viedajecie», — było skazana.
Łukašenka taksama prapanavaŭ rasijskamu boku ŭdzieł u realizacyi prajektaŭ u śfiery chimičnaj pramysłovaści. «U nas dobryja vopyt i škoła pa vytvorčaści azotnych uhnajeńniaŭ. U vas užo pad 50 młrd kub. m hazu, vy nie stavicie na ekspart, ale, ja dumaju, unutry, u sajuznaj dziaržavie, my mahli b damovicca.I vy mahli b pad 3 młrd kub. m pierapracoŭvać, kali my pabudujem novy zavod, a placoŭka ŭžo hatovaja. Vy pastaŭlajecie haz, damovimsia pa akcyjanavańni pradpryjemstva i pastaŭkach na zamiežny rynak, vielmi dobraja ekanomika», — padkreśliŭ jon. Pry hetym Łukašenka dadaŭ, što ŭ vypadku nieabchodnaści hatovy abmierkavać hetuju temu z prezidentam Rasii Uładzimiram Pucinym.
«My hatovyja adkryć dźviery, dla taho kab vy mahli vielmi efiektyŭna ŭvajści ŭ Biełaruś, i pažadana, viadoma, kab była vysokaja dachodnaść i efiektyŭnaść vašaj raboty», — zajaviŭ Łukašenka.«Pryncyp adzin: u nas pavinna być zacikaŭlenaść troški vyšej, čym u inšych kampanij. Ja dumaju, vy zmožacie Biełaruś zacikavić, pakolki abjomaŭ i nafty, i hazu ŭ vas vielmi šmat, i napieradzie vialikaje raźvićcio», — skazaŭ jon.
Ihar Siečyn adznačyŭ, što kampanija aktyŭna pracuje ŭ Biełarusi i pastaŭlaje prykładna pałovu abjomaŭ nafty, što pierapracoŭvajecca na biełaruskich zavodach.«Całkam paćviardžaju, što pryncypy, jakija my budziem vyznavać ŭ pracy z našymi stratehičnymi biełaruskimi partniorami, — heta davier, uzajemnaja pavaha i ŭlik uzajemnych intaresaŭ. My hatovy ŭ poŭnym abjomie dzialicca vyhadaj z našymi partniorami i stvarać doŭhaterminovyja prajekty», — ścisła cytuje jahonyja słovy prezidenckaja pres-słužba.
