Dakładčyk delehacyi Jeŭraparłamienta (JEP) pa Biełarusi Justas Paleckis.
Dakładčyk delehacyi Jeŭraparłamienta (JEP) pa Biełarusi Justas Paleckis prapanuje prypynić sankcyi ES u dačynieńni da klučavych biełaruskich čynoŭnikaŭ. Takaja rekamiendacyja ŭtrymlivajecca ŭ dakładzie, jaki jeŭradeputat padrychtavaŭ dla Savieta ES, Jeŭrakamisii i Słužby źniešnich dziejańniaŭ, ab dalejšaj palitycy Jeŭrasajuza ŭ dačynieńni da Biełarusi.
Papiaredni varyjant dakłada raźmieščany na sajcie Jeŭraparłamienta i ŭ dalejšym budzie razhledžany na adnoj ź siesij JEP.
Paleckis zaznačaje, što svabodnyja i sumlennyja vybary nie pravodzilisia ŭ Biełarusi z 1994 hoda.Adnak u 2008–2010 hadach nazirałasia stanoŭčaje raźvićcio adnosinaŭ pamiž Biełaruśsiu i Jeŭrasajuzam. Jano było pierapyniena paśla žorstkaha razhonu mirnaj akcyi pratestu 19 śniežnia 2010 hoda, paśla prezidenckich vybaraŭ.
Aŭtar dakłada zajaŭlaje, što pryniatyja papraŭki ŭ biełaruskaje zakanadaŭstva «dazvalajuć dalejšyja represii suprać hramadzianskaj supolnaści, u tym liku suprać pravaabaroncaŭ, niezaležnych ŚMI i advakataŭ». «Ale ŭ 2012 hodzie było zaŭvažana palapšeńnie situacyi z pravami čałavieka», — piša Paleckis.
U dakumiencie jasna havorycca, što papiaredniaj umovaj narmalizacyi jeŭrapiejska-biełaruskich adnosin zastajecca «vyzvaleńnie i palityčnaja reabilitacyja palityčnych źniavolenych».
Dakładčyk rekamienduje vykarystać staršynstva Litvy ŭ ES (z 1 lipienia) i samit Uschodniaha partniorstva ŭ Vilniusie vosieńniu 2013 hoda «jak unikalnuju mahčymaść dla palapšeńnia adnosinaŭ ź Biełaruśsiu, u tym liku dla pierazahruzki palityčnaha dyjałohu, u pryvatnaści dla praviadzieńnia demakratyčnych reform, pavažańnia viaršenstva zakonu, pravoŭ čałavieka i fundamientalnych svabod».
Paleckis taksama rekamienduje razhledzieć «prypynieńnie dziejańnia sankcyj ES u dačynieńni da klučavych biełaruskich čynoŭnikaŭ dla pašyreńnia nieabchodnych dypłamatyčnych kanałaŭ kamunikacyi ź Biełaruśsiu z ulikam praviadzieńnia samitu Uschodniaha partniorstva».
Aŭtar dakłada miarkuje, što nieabchodna padrychtavać stratehičnuju darožnuju kartu dla Biełarusi, u jakoj buduć utrymlivacca prapanovy pa pryjarytetnych kirunkach reform u krainie i prapanovy pa aktyvizacyi palityčnaha dyjałohu.
Na dumku jeŭraparłamientaryja, u dalejšym heta «moža pryvieści da adnaŭleńnia pieramoŭ pa novym usioabdymnym pahadnieńni». U hetaj karcie taksama pavinny ŭtrymlivacca prapanovy pa adnaŭleńni mižparłamienckich suviaziaŭ u miežach Jeŭraniesta, miarkuje Paleckis.
Jon rekamienduje aktyvizavać kantakty ź biełaruskimi čynoŭnikami dla pavyšeńnia ich «adkrytaści ŭ dačynieńni da ES i ŭzmacnieńnia supracoŭnictva pamiž Biełaruśsiu i Jeŭrasajuzam».
Aprača taho, havorycca ŭ dakładzie, nieabchodna pryciahnuć biełaruskija ŭłady da paŭnavartasnaha ŭdziełu ŭ prahramie «Dyjałoh ab madernizacyi», skiravanaj na raźvićcio kankurentnaj ekanomiki, pluralizmu ŭ hramadstvie i viaršenstva zakonu.
Na dumku Paleckisa, varta zaachvočvać taksama hramadzianskuju supolnaść i palityčnuju apazicyju Biełarusi ŭ suviazi ź ich udziełam u «Dyjałohu ab madernizacyi» i ŭ dalejšym padtrymlivać heta, u tym liku finansava.
Dakładčyk ličyć nieabchodnym dla ES praduhledzieć usie mahčymyja varyjanty, kab harantavać:
— praviadzieńnie Biełaruśsiu refarmavańnia vybarčaha zakanadaŭstva ŭ adpaviednaści z rekamiendacyjami Biuro pa demakratyčnych instytutach i pravach čałavieka ABSIE;
— źniaćcie abmiežavańniaŭ u dačynieńni da demakratyčnaj apazicyi;
— poŭnuju madernizacyju sudovaj sistemy ŭ adpaviednaści ź mižnarodnymi standartami;
— pracu nad pytańniem admieny śmiarotnaj kary;
— refarmavańnie Kryminalnaha kodeksa, u pryvatnaści admienu artykuła 193.1 (dziejnaść ad imia niezarehistravanaj arhanizacyi);
— dazvoł dostupu dla pradstaŭnikoŭ adpaviednych mižnarodnych arhanizacyj u biełaruskija turmy;
— likvidacyju ŭsich pieraškodaŭ dla rehistracyi niaŭradavych arhanizacyj;
— svabodu ŚMI i roŭnaha da ich dostupu ŭsich hramadzian;
— stvareńnie niezaležnaha instytuta ombudsmiena;
— stvareńnie roŭnych mahčymaściaŭ, u tym liku adsutnaść dyskryminacyi dla ŭsich mienšaściaŭ.
Paleckis rekamienduje vykarystać kanstruktyŭny techničny dyjałoh pamiž ES i Biełaruśsiu pa makraekanamičnym raźvićci i finansavych pytańniach dla dasiahnieńnia realnaj prychilnaści Biełarusi da pastupovych makraekanamičnych i strukturnych reform, uklučajučy pryvatyzacyju dziaržpradpryjemstvaŭ, libieralizacyju cenavaj, handlovaj i bankaŭskaj sistem, a taksama baraćbu z karupcyjaj.
Jak zaznačajecca ŭ dakładzie, Biełarusi varta vykanać rekamiendacyi Mižnarodnaj arhanizacyi pracy, u tym liku ab svabodzie asacyjacyi, rehistracyi i dziejnaści niezaležnych prafsajuzaŭ.
Paleckis rekamienduje zaklikać biełaruskija ŭłady vykarystać samyja vysokija mižnarodnyja standarty biaśpieki pry budaŭnictvie AES.
Dakładčyk rekamienduje ES pavialičyć techničnuju i finansavuju padtrymku hramadzianskaj supolnaści, NVA, niezaležnych ŚMI, pravaabaroncaŭ i prafsajuzaŭ Biełarusi.
Rekamiendavana taksama ŭ adnabakovym paradku ablehčyć pracedury vydačy viz i źnizić ich košt ź ciapierašnich 60 jeŭra da ŭzroŭniu, prymalnaha dla biełaruskich hramadzian.
Padčas padrychtoŭki dakłada Paleckis naviedaŭ Minsk 18–21 sakavika, jon sustreŭsia z aficyjnymi asobami i pradstaŭnikami hramadzianskaj supolnaści Biełarusi.
Biełaruskaje MZS vykazała nadzieju na toje, što dakład jeŭradeputata Paleckisa pa Biełarusi dapamoža aktyvizavać dyjałoh pamiž Minskam i Brusielem.
