 Taciana Sieviaryniec |
Viciebskaja abłasnaja sudovaja kalehija admoviła Tacianie Sieviaryniec va ŭznaŭleńni na pracy, paćvierdziŭšy rašeńnie Pieršamajskaha rajonnaha sudu pra zakonnaść jejnaha zvalnieńnia. Spadarynia Sieviaryniec ličyć vyrak sudździaŭ palityčna matyvavanym.
Taciana Sieviaryniec kaža, što adpačatku nia duža spadziavałasia,kab sudovaje raźbiralnictva mahło zavieršycca na jejnuju karyść. Vynik pasiadžeńnia abłasnoj kalehii tolki spraŭdziŭ jejnyja mierkavańni.
«Siońniašniaje rašeńnie Viciebskaj abłasnoj kalehii jakraz idzie ŭ adnoj płyni z tym rašeńniem, što było pryniata ŭ dačynieńni da majho syna ŭčora: kali nijakich parušeńniaŭ zakonu nie było — i ŭsie dokazy rassypalisia. Karaciej, heta jašče adna ilustracyja taho, što ŭ našaj krainie nia dziejničajuć zakony. I kali adna z sudździaŭ tak ździekliva zaŭvažyła «ja nie razumieju, dzie tut palityka», to adrazu stała zrazumieła: mienavita palityčnyja pryčyny nie dazvolili sudździam pryniać pravilnaje rašeńnie nakont majho zvalnieńnia. Kali b nie palityčnaja dziejnaść majho syna i nia toje, što ja jamu dapamahaju, hetaj sytuacyi ŭvohule nie było b! Ułady chočuć, kab ja stajała pierad imi na zadnich łapkach dy hladzieła im u rot. A ja tak nikoli nie rabiła j rabić nia budu!»
Kastuś Sieviaryniec, davieranaja asoba spadaryni Taciany, sprabavaŭ pryciahnuć uvahu Kalehii da taho, što kiraŭnictva rajonnaha adździełu adukacyi skarystała nieŭnarmavanaść asobnych aktaŭ pracoŭnaha zakanadaŭstva, kab zvolnić nastaŭnicu‑apazycyjanerku. Adnak sudździ jahonych dokazaŭ nie pačuli.
Kastuś Sieviaryniec: «Nia zvažyli ni na Pracoŭny kodeks, ni na kalektyŭnuju damovu, ni na status! Usio ŭ ich było vyrašana zahadzia. A tamu my budziem abskardžvać hetu pastanovu ŭ abłasnoj prakuratury, u respublikanskaj prakuratury. Karaciej, projdziem usie instancyi i vyjdziem, kali tut ničoha nia vyrašycca, na mižnarodny ŭzrovień. Kab usio ž damahčysia praŭdy j spraviadlivaści!»
Taciana Sieviaryniec była zvolniena ź siaredniaj škoły №40 nibyta za prahuły. Naprykancy sakavika jana napisała zajavu na adpačynak za svoj košt, jakuju padpisaŭ zahadčyk rajonnaha adździełu adukacyi Ŭładzimier Šłoma. Praz kolki dzion vyśvietliłasia, što paźniej jon admianiŭ ułasnaje rašeńnie. Viarnuŭšysia z adpačynku, Taciana Sieviaryniec daviedałasia, što prapuściła 6 pracoŭnych dzion. 28‑ha krasavika jaje zvolnili. I ciapier spadarynia Sieviaryniec biespracoŭnaja.
