Biełaruś abyšła ZŠA i stała suśvietnym lidaram spamu 4
Biełaruś abahnała ZŠA i zaniała pieršaje miesca pa abjomie niepažadanych elektronnych paviedamleńniaŭ, havorycca ŭ błohu kampanii Appriver, jakaja śpiecyjalizujecca na baraćbie sa spamam.
Istotny rost abjomaŭ spamu, jaki adpraŭlajecca ź Biełarusi, byŭ zafiksavany 13 krasavika 2013, kali štodnia z terytoryi Biełarusi pačało prychodzić bolej za 12 miljonaŭ niepažadanych rekłamnych paviedamleńniaŭ. U pačatku hoda hety pakazčyk składaŭ 2 miljony paviedamleńniaŭ za dzień. Za paŭtara miesiaca nazirańniaŭ śpiecyjalisty nie zaŭvažyli istotnaha źnižeńnia patoku spamu ź Biełarusi. Pry hetym dola spamu ŭ ahulnym abjomie elektronnaj karespandencyi Biełarusi dasiahnuła 99%.
U asnoŭnym rekłamnyja paviedamleńni, jakija pastupajuć ź biełaruskich siervieraŭ, utrymlivajuć karotki tekst i spasyłku na toj ci inšy sajt.
Spasyłki čaściakom viaduć na nierabočyja sajty abo staronki farmaceŭtyčnych kampanij, jakija pradajuć leki. U redkich vypadkach pa spasyłkach raspaŭsiudžvajecca škodanosnaje prahramnaje zabieśpiačeńnie.
Z 13 krasavika ź Biełarusi pastupiła bolš za 550 miljonaŭ spam-paviedamleńniaŭ, tady jak z ZŠA, raniejšaha lidara ŭ abjomie niepažadanych dopisaŭ, — tolki 447 miljonaŭ. Usiaho na dolu Biełarusi paśla istotnaha pavieličeńnia kolkaści spamu prypadaje 16,3 pracenta ad suśvietnaha abjomu niepažadanych elektronnych listoŭ, na dolu ZŠA — 15,1 pracenta, kala vaśmi pracentaŭ spamu adpraŭlajecca z Ukrainy i 5,8% — z Kitaja, adznačaje The Register. Raniej Biełaruś nie fihuravała ŭ liku krain, viadomych pavyšanaj aktyŭnaściu spamieraŭ.
