Mikałaj Chalezin i Džud Łoŭ.
Upieršyniu «Svabodny teatr» atrymaŭ mahčymaść prajavić siabie ŭ kino. Pieršyja kroki ŭ kinaindustryju jany pačynajuć z davoli vysokaj prystupki. Heta nie tolki padtrymka papularnaj brytanskaj levalibieralnaj haziety The Guardian i teatra Young Vic. Adzin z hierojaŭ užo źniataj karotkamietražki — Džud Łoŭ. My pahutaryli ź Mikałajem Chalezinym — mastackim kiraŭnikom «Svabodnaha teatra» pra stužku i supracoŭnictva z Džudam Łoŭ.
Štohod hazieta Guardian i teatr Young Vic abirajuć 3–4 najbolš značnyja teatralnyja pastanoŭki, aŭtary jakich atrymlivajuć mahčymaść źniać karotkija filmy. Sioleta ŭ čaćviorku ŭvajšoŭ «Svabodny teatr».
NN: Jakim čynam vam udałosia pačać supracoŭnictva z Guardian i Young Vic?
Mikałaj Chalezin: «Svabodny teatr» źjaŭlajecca rezydentam Young Vic. Tut znachodzicca naš Łondanski ofis, tut my štohod ihrajem premjernyja śpiektakli.
Z hazietaj Guardian ŭ nas taksama daŭnija suviazi. Heta vydańnie ŭviest čas piša pra teatr, publikuje recenzii na našy śpiektakli. Kali hety hazietny kancern pravodziŭ kanfierencyju TED, Natalla Kalada była zaprošana tudy dla vystupu, i jaje prezientavaŭ Džud Łoŭ. Guardian i Young Vic pastajanna supracoŭničajuć, tamu naš aljans paŭstaŭ zusim arhanična.
NN: Ci ŭsie tvorčyja hrupy mieli adnolkavyja umovy dla zdymak?
MCH: Umovy va ŭsich čatyroch tvorčych hrup adnolkavyja: vydzielena adnolkavaja suma na zdymačnyja vydatki pry zachavańni absalutnaj tvorčaj svabody, kastynhu i stylu vykładu materyjału.
NN: Jak naradziłasia ideja karotkamietražki?
MCH: Pieršapačatkovy šturšok da stvareńnia scenara dała Natalla Kalada, prapanavaŭšy źmiaścić historyju ŭ terminale aeraporta. Paśla hetaha ja napisaŭ scenar, zaprasiŭšy da supracoŭnictva bliskučaha dramaturha Łoru Vejde, jakaja adaptavała jaho pad brytanskuju aŭdytoryju i zredahavała anhłamoŭnyja repliki. My šmat hadoŭ siabrujem i dobra razumiejem adzin adnaho, tamu nad scenaram pracavałasia lohka. Hetaja lohkaść kanviertavać ŭ vynik: scenar byŭ pryniaty ź pieršaha drafta — my jaho praktyčna nie dapracoŭvali, što dla kiniematahrafičnaj asiarodździa vialikaja redkaść.
NN: Heta, peŭna vielmi značnaja padzieja dla «Svabodnaha teatra». U čym ža budzie asnoŭny siužet stužki?
MCH: My vielmi daŭno prymiervalisia da kino, i razhladajem hety prajekt jak pieršy krok u kinaindustryju. U nas byŭ dośvied pracy ŭ śfiery dakumientalnaha, i ciapier my pačynajem asvojvać pole ihravoha kino. Hety film pra toje, jak ludzi mohuć razumieć adzin adnaho, navat nie razmaŭlajučy na adnoj movie. Siužet filma budujecca vakoł sustrečy ŭ terminale łondanskaha aeraporta biełarusa (rolu jakoha vykonvaje sam Mikałaj Chalezin), jaki pavinien pierasieści na rejs da Minska, i brytanca (Džud Łoŭ), jaki viarnuŭsia dadomu. Nie chaču raskazvać siužet, kab zachavałasia intryha dla hledačoŭ. Hałoŭnyja roli zhulajem my z Džudam, pakolki my zbolšaha źjaŭlajemsia pratatypami hierojaŭ, a funkcyi režysiora pahadziŭsia ŭziać na siabie Uładzimir Ščerbań.
NN: U adnym ź intervju Vy kazali, što historyja filma — heta historyja ŭzajemadziejańnia brytanskaha i biełaruskaha teatra. Ci budzie ŭ stužcy adsył da Biełarusi?
MCH: My zaŭsiody pracujem z dakumientalnym materyjałam i z tym vopytam, jaki pieražyty nami asabista. Film nie stanie vyklučeńniem, i biełaruskaja tema ŭ im, viadoma ž, budzie prysutničać. Kali razhladać hety film jak niejki znak, to heta sapraŭdy mietafara ŭzajemaadnosin biełaruskaha «Svabodnaha teatra» z brytanskim teatram, jaki prychodziŭ i prychodzić nam na dapamohu ŭsie apošnija hady. Vytvorčaść śpiektaklaŭ — heta technična składany i darahi praces, ale nam zaŭsiody
NN: Čamu ŭ jakaści druhoha hieroja byŭ abrany mienavita Džud Łoŭ? Nakolki blizkija ŭ vas ź im adnosiny?
MCH: My z Džudam siabrujem užo niekalki hadoŭ i, niahledziačy na vielmi ščylnyja hrafiki zaniataści, užo paśpieli zrabić razam dosyć šmat. U 2010 hodzie jon, razam z Sijenaj Miler, Semam Uestam i Adžoa Andu adyhraŭ u śpiektakli «Svabodnaha teatra» «Spaścihajučy kachańnie» na scenie teatra Young Vic. U 2011 my ź im syhrali śpiektakl «Pakaleńnie Jeans» u budynku Brytanskaha parłamientu. Ciapier — film. U nas blizkija adnosiny, ale sustrakacca časta nie atrymlivajecca, pakolki hrafiki i ŭ jaho, i ŭ nas raśpisany na hady napierad. Dla taho, kab źjaviłasia mahčymaść źniać film, my pačali ŭzhadnieńni 10 miesiacaŭ tamu. U nas šmat sumiesnych idej, ale, na žal, vielmi doŭha prachodzić praces ŭzhadnieńnia terminaŭ i dat.
NN: Džud Łoŭ nieadnarazova padtrymlivaŭ nie tolki biełarusaŭ paśla vybaraŭ 2010 h., ale i biełaruskich palitviaźniaŭ. Nakolki jon daśviedčany ŭ biełaruskich padziejach?
MCH: Džud vielmi sučasny i erudziravany čałaviek, i dobra znajomy ź situacyjaj u Biełarusi. U 2010 hodzie jon zapisaŭ videazvarot da biełarusaŭ. U 2011 hodzie razam z Kievinam Spejsi dy inšymi brytanskimi aktorami udzielničaŭ u akcyi ŭ padtrymku biełaruskich palitviaźniaŭ. Niekalki dzion tamu my zapisali jaho videazvarot da maładych ludziej, z zaklikam paŭdzielničać vałanciorami ŭ našaj kampanii Give a Body Back. Mnie zdajecca, što ŭ hetym vielmi adbivajecca ŭpłyŭ jaho baćkoŭ. Jany cudoŭnyja ludzi, i mama Džuda ŭžo niekalki razoŭ brała ŭdzieł u akcyjach za vyzvaleńnie biełaruskich palitviaźniaŭ.
NN: Jak chutka možna budzie biełaruskamu hledaču pabačyć stužku?
MCH: My zaviaršyli zdymku, i ciapier idzie postprodakšn — mantaž, ahučvańnie. Pakul nie pryznačanaja data vychadu — heta prerahatyva haziety Guardian, na sajcie jakoj i adbudziecca premjera filma. Miarkuju, heta adbudziecca ŭ lipieni hetaha hoda.
