 Stanisłaŭ Šuškievič |
Učora Biełaruskaje telebačańnie ŭ vynikovaj niadzielnaj «Panaramie» pakazali repartaž ab tym, što były śpikier Viarchoŭnaha Savietu Biełarusi Stanisłaŭ Šuškievič źjaŭlajecca prychilnikam «Carkvy abjadańnia», jakaja pryznanaja ŭ Biełarusi destruktyŭnaj sektaj.
U interviju NN Stanisłaŭ Šuškievič kateharyčna abvierhnuŭ infarmacyju Pieršaha kanału:
«Ni ŭ jakija sekty ja nie ŭvachodziŭ, nie ŭvachodžu i ŭvachodzić nia budu, — adrazu adznačyŭ Stanisłaŭ Šuškievič. — Razam z tym, ja nasamreč znajomy ź lideram «Carkvy Abjadnańnia» San Men Munam. Znajomy tak, jak i mitrapalit mienski i słucki Fiłaret, jak były kiraŭnik SSSR Michaił Harbačoŭ, deputaty polskaha i litoŭskaha sejmaŭ, jak rasiejski parlamentar Mironaŭ. Ja nieadnarazova z zadavalnieńniem udzielničaŭ u śvieckich kanferencyjach i seminarach, jakija spansaravaŭ Mun. Upieršyniu z hetym čałaviekam ja sustreŭsia ŭ 1992 hodzie ŭ Seule. Paśla byli jašče sustrečy ŭ toj ža Paŭdniovaj Karei, ZŠA, Maskvie, Vilni. Pryznajusia ščyra, mnie padabajucca miratvorčyja idei munizmu. Hetyja ludzi nie ŭžyvać alkaholu i žyvuć pa chryścijanskich pryncypach, tamu mnie jany vielmi impanujuć. Nie razumieju, čamu heta carkva ŭ Biełarusi pryznanaja sektaj. Darečy, 15 vieraśnia ja razam z žonkaj laču ŭ Ńju‑Jork na čarhovy seminar, jaki arhanizoŭvajecca pry sponsarskaj padtrymcy Muna. Ale chaču zapeŭnić, bližejšaj kanfesijaj dla mianie zastajecca katalicyzm».
Stanisłaŭ Šuškievič pierakanany, što pravakacyja BT źviazanaja ź jahonym vyłučeńniem na Nobeleŭskuju premiju miru.
«Kali ad pačatku ja mieŭ tolki paŭpracenta šancaŭ na atrymańnie premii, to ciapier maje kaciroŭki pavysiacca da pracenta, za što dziakuj našym televizijnikam», — śmiajecca Stanisłaŭ Stanisłavavič.
