Patryjarch Kirył uskładaje vianok da pomnika Lindzie.
Na minułym tydni stała viadoma, što hłava Ruskaj pravasłaŭnaj carkvy ŭ kancy lipienia pryjedzie ŭ Biełaruś. Vizit źviazany sa śviatkavańniem 1025-hodździa Chryščeńnia Rusi. Ci budzie ŭ hrafiku ijerarcha naviedvańnie miesca masavych rasstrełaŭ u Kurapatach?
Patryjarch Kirył viadomy svaimi pajezdkami da miescaŭ palityčnych represij. Navat sioleta, u červieni, padčas vizitu ŭ Estoniju jon uskłaŭ kvietki da Manumienta smutku (pomnik Lindzie) u Talinie. Pryčym heta adbyłosia 14 červienia, u dzień pamiaci departacyi estoncaŭ u hady stalinskich represij. «Nichto tak nie płanavaŭ: atrymałasia nibyta vypadkova. Ale my, vierujučyja ludzi, navat u vypadkovaści niaredka zdolnyja bačyć ruku Božuju», — skazaŭ śviatar u Talinie.
«My viedajem, što pryčynaj hetych biezzakońniaŭ byli tyja ideałahičnyja ŭstanoŭki, što vyklučali luboje inšadumstva. I ad taho, što ź ludźmi zmahalisia samymi žorstkimi srodkami i sposabami, pakutavali miljony ludziej u Estonii, Rasii, Ukrainie, Biełarusi, Małdovie i mnohich inšych miescach», — adznačyŭ hłava RPC.
Kab vytrymać bałans, miž inšym, jon naviedaŭ u Talinie i Bronzavaha sałdata, pomnik savieckim voinam.
Dla patryjarcha heta nie adzinkavaja padobnaja pajezdka. Letaś jon pravioŭ słužbu ŭ Katyni, na miescy masavych rasstrełaŭ polskich žaŭnieraŭ. Jašče raniej naviedaŭ pachavańni represavanych u Karelii — uročyšča Sandarmoch.
Takaja ŭvaha da miescaŭ stalinskich represij patryjarcha Kiryła abumoŭleny tym, što jahony dzied, śviatar Vasil Hundziajeŭ, za Stalinym adbyvaŭ pakarańnie ŭ tym liku ŭ łahiery na Sałaŭkach.
Tamu i vizit u Kurapaty vyhladaje realnym. A dla adnaŭleńnia histaryčnaj pamiaci ŭ Biełarusi taki krok byŭ by vielmi važnym.
Darečy, u listapadzie apostalski nuncyj u Biełarusi arcybiskup Kłaŭdya Hudžeroci ŭskłaŭ kvietki da pomnika ŭ miemaryjalnym kompleksie «Mały Traścianiec» i ŭ Kurapatach. I pravioŭ u kaściole słužbu za biełarusaŭ, jakija stali achviarami vojnaŭ i represij.
