Chulihan, jaki źbiŭ doktara-siryjca, źmieščany ŭ izalatar 4

Chulihan, jaki napaŭ na doktara-siryjca ŭ elektraciahniku Orša — Minsk praviadzie ŭ izalatary časovaha ŭtrymańnia (IČU) troje sutak. Zaŭtra budzie viadomaja miera strymańnia, paviedamili ŭ Śledčym kamitecie.

Padazravany 1994 h.n. užo apytany. U chodzie dopytu jon rastłumačyŭ, što ŭdaryŭ siryjca, bo toj jaho spravakavaŭ.

Jakich-niebudź prykmiet taho, što źbićcio adbyłosia z-za nacyjanalnaści doktara, nie ŭstanoŭlena.

Nahadajem, 6 lipienia ŭ elektryčcy Orša — Minsk u rajonie st. Słabada — Ściapianka małady čałaviek z šumnaj kampanii źbiŭ siryjca, jaki, jak vyśvietliłasia paźniej, źjaŭlajecca kliničnym ardynataram 10-j haradskoj kliničnaj balnicy Minska. Kastryčnicki rajonny adździeł Śledčaha kamiteta raspačaŭ kryminalnuju spravu pa č.1 art. 339 («Chulihanstva»).

Učora ranicaj byli zatrymanyja ŭsie čaćviora pasažyraŭ, jakija razam z napadnikam na siryjca jechali ŭ ciahniku. Jak raspavioŭ adzin ź siabroŭ napadnika, učora troch z kampanii dapytali ŭ jakaści śviedak i adpuścili, a siabra «zakryli na troje sutak».

Adkazvać na pytańnie, što stała pryčynaj źbićcia, małady čałaviek nie staŭ. «Za što jon byŭ źbity, zastaniecca tajamnicaj», —

adkazaŭ małady čałaviek na śćviardžeńni niekatorych vidavočcaŭ ab tym, što ahresiju adnaho vyklikała ŭśmieška siryjca.

«Dy nie za ŭśmiešku, nie treba svaje viersii vyłučać», — taksama dadaŭ małady čałaviek. Na pytańnie, ci nie było žadańnia spynić adnaho, jon adkazaŭ tak:

«Było, ale tam było tolki paru udaraŭ, i jon adyšoŭ».

Sam paciarpieły na kantakt z žurnalistami nie idzie.

Kaciaryna Siniuk, Tut.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH