U Bresckim spartkompleksie «Viktoryja» 12 lipienia prajšoŭ28-y turnir Belarus Fighting Championship, jaki sabraŭ mocnych bajcoŭ ź Biełarusi, Polščy i Ukrainy.
U miežach turniru prajšła matčavaja sustreča Biełarusi i Polščy, jakaja zaviaršyłasia ŭpeŭnienaj pieramohaj apošniaj: polskija bajcy vyjhrali ŭsie try bitvy.
Prahrama viečara naličvała dzieviać bajoŭ (vosiem mužčynskich i adzin žanočy) i ŭ čatyroch ź ich viktoryju śviatkavali voiny bresckaha kłuba «Busida». Rehłamient boju: dva raŭndy pa piać chvilin, u vypadku kali jany nie vyjaŭlajuć pieramožca pryznačajecca dadatkovaja piacichvilinka.
Pieršy boj u katehoryi da 61 kh doŭžyŭsia ŭsiaho 1 chvilinu 20 siekund. Brestaŭčanin Ivan Hładki adpraviŭ u nakaŭt hościa z Ukrainy Ivana Ciemu. Druhi boj u katehoryi da 69 kh byŭ jašče karaciejšy, minčaninu Eduardu Muravickamu ź minskaha kłuba «Liha» dla pieramohi nad pradstaŭnikom inšaha staličnaha kłuba «Reślinh Stajł» spatrebiłasia ŭsiaho 35 siekund.
Daterminova (za 1 chvilinu 40 siekund) skončyŭsia boj pamiž haspadarom rynha z kłuba «Busida» Alaksiejem Dubininym i pradstaŭnikom kłuba «Maksimus» (Mahiloŭ) Dzianisam Kavalovym u katehoryi da 70 kh. A voś Valeryj Špak (kłub «Busida») ŭ vahavaj katehoryi da 84 kh ustupiŭ pa ačkach u troch raŭndach ukrainskamu spartsmienu Bahdanu Katłavianavu.
Try raŭndy dla vyjaŭleńnia adnosin spatrebiłasia Hlebu Marozavu i minčaninu Alaksandru Zinoŭjevu (katehoryja da 93 kh). Pośpiech śviatkavaŭ pradstaŭnik kłuba «Busida».
U matčavaj sustrečy Polščy i Biełarusi Kamił Sielva (vahavaja katehoryja da 66 kh) byŭ macniejšy za Arcioma Žuka (kłub «Busida»), Łukaš Hrachoŭski (da 70 kh) vyjhraŭ u minčanina Siarhieja Siamižona, a Damijan Biłaš (da 77 kh) apynuŭsia macniejšy za haspadara rynha Ilji Martysiuka.
A adziny žanočy boj pamiž brestaŭčankaj z kłuba «Busida» Ludmiłaj Radźko i ŭkrainkaj Anastasijaj Maziepaj praciahvaŭsia ŭsiaho tryccać siekund. Biełaruska ŭziała vierch pry dapamozie techničnaha nakaŭtu.
