Rasijski apazicyjanier Alaksiej Navalny, asudžany da piaci hadoŭ pazbaŭleńnia voli pa spravie «Kiraŭlesa» i vyzvaleny pad padpisku pra niavyjezd, viarnuŭsia ŭ Maskvu.
Ciahnik prybyŭ na Jarasłaŭski vakzał u 09:45 pavodle maskoŭskaha času. Na pieronie sabraŭsia vialiki natoŭp prychilnikaŭ palityka — mnohija z kvietkami i ŭ futbołkach z nadpisam «Navalny», a taksama žurnalisty i AMAP.
Rajon byŭ ačepleny palicyjaj, niepadalok ad Kamsamolskaj płoščy raźmiaścilisia dziasiatki palicejskich aŭtamašyn i aŭtazakaŭ.
Niezadoŭha da prybyćcia ciahnika palicejskija pa hučnaŭzmacnialnikach stali zaklikać ludziej pakinuć płošču pierad pieronam u metach biaśpieki: nibyta ŭ rajonie pierona znojdzieny padazrony pradmiet. Paźniej było abvieščana, što pahroza vybuchu akazałasia łžyvaj.
Adnadumcy Alaksieja Navalnaha sustreli jaho apładysmientami i praviali praz «žyvy kalidor» ad pierona da pryvakzalnaj płoščy, dzie adbyŭsia stychijny mitynh.
Na im Alaksiej Navalny padziakavaŭ usim za padtrymku, abviaściŭ, što budzie ŭdzielničać u vybarach mera Maskvy, zapłanavanych na vierasień, i zaklikaŭ padtrymać rasijskich palitviaźniaŭ, zhadaŭšy, u pryvatnaści, aryštavanych pa «bałotnaj spravie», udzielnic hurtu Pussy Riot i Michaiła Chadarkoŭskaha.
«My idziom na vybary i my pieramožam!», — zajaviŭ prysutnym Alaksiej Navalny.