U Safii, stalicy Bałharyi, bałhary ŭžo 40 dzion praciahvajuć pratestavać, patrabujučy adstaŭki ŭradu.
22 lipienia kala 80 čałaviek sabralisia pierad parłamientam papić kavy, prapanujučy hety napoj taksama minakam. Hetaje tradycyjnaje «kavapićcio», skiravanaje suprać ciapierašniaha sacyjalistyčnaha ŭrada premjer-ministra Płamiena Arašarskaha, adbyłosia ŭžo 27-my dzień zapar. Nadviačorkam pratestoŭcy z-pad parłamienta dałučylisia da antyŭradavaha maršu, jaki ŭ stalicy Bałharyi adbyvajecca štodnia, pačynajučy z 14 červienia. Siońnia čakajecca ŭžo 40-y antyŭradavy marš u Safii.
Pratestoŭcy patrabujuć adstaŭki ŭradu Płamiena Arašarskaha. Kažuć, što jany hatovyja pastavić rekord u Knizie Hinesa pa praciahłaści pratestaŭ, kali ŭrad, jak ciapier, budzie admaŭlacca iści ŭ adstaŭku.
Pratesty, jakija pačalisia ŭ siaredzinie červienia, byli vyklikany naznačeńniem miedyjnaha mahnata Dełana Piejeŭskaha na pasadu šefa dziaržaŭnaj słužby biaśpieki, jakaja zajmajecca, siarod inšaha, rasśledavańniem arhanizavanaj złačynnaści. Ale dla šmat kaho ŭ Bałharyi sam Piejeŭski bačycca jak asoba, anhažavanaja ŭ kantakty z kryminalnym śvietam.
Premjer-ministr Arašarski skasavaŭ pryznačeńnie Piejeŭskaha, ale pratesty nie spynilisia, bo bałhary ličać, što ciapierašni ŭrad, u jakim hałoŭnuju rolu adyhryvajuć sacyjalisty (kolišnija kamunisty), padtrymlivaje nieprazrystyja kantakty ź inšymi bałharskimi aliharchami.
Nikoła Pietraŭ, žurnalist sajtu novinite.com, skazaŭ, što na štodzionnyja antyŭradavyja maršy ŭ stalicy Bałharyi źbirajecca jak minimum niekalki tysiač udzielnikaŭ, a čas ad času vychodziać na ich i pa 20 tysiač čałaviek.
