— Što ciapier adbyvajecca ŭ Salihorsku — pasadziać jašče kuču ludziej za ŭčorašni pikiet, u čym sens? Vidavočnaja siła na baku ŭłady, navošta biazdumna padstaŭlacca? Jany ž buduć prosta sžać i takim čynam vyklučać ludziej z supracivu. Kali łaska, adkažycie biez prapahandy.
— U salihorskich sudach udzielnikam učorašniaj akcyi salidarnaści dajuć štrafy. A pratest i supraciŭ na vulicy patrebnyja. Kali nia budzie Maładoha frontu na vulicach — pa apazycyjaneraŭ režym pryjdzie na kuchni.
— Jak Pavał dumaješ dziejničać sa svaimi paplečnikami pa partyi ŭ vypadku, kali pa BCHD budzie ŭzbudžana kriminalnaja sprava pa 193 artykułu? Što zaraz možna zrabić, kab pryduchilić mahčymyja nastupstvy hetaha? Dzianis
— Dzianis, 193 artykuł – niezakonny. Abaviazak kožnaha chryścijanina adkryta vykryvać biezzakońnie. Što rabić? Jak napisana, upakorciesia Bohu, usupraciŭciesia djabłu, i uciače ad vas. Biełaruskaj chryścijanskaj demakratyi nieabchodna dapamahčy chryścijanam pieraadoleć strach pierad režymam, sychodziačy z devizu «Bajusia Boha, i bolš nikoha». Treba stavić na typova chryścijanska-demakratyčnyja metady pracy – pryvatnyja i siamiejnyja sustrečy, miascovaje samakiravańnie, ruplivuju pracu z cerkvami, sacyjalnymi i prafesijnymi hrupami. Urešcie, nielha zabyvacca, što rańniaje chryścijanstva pašyrałasia mienavita praz hanieńni.
— Illa Kopył, pensijaner, Miensk «Vy zrabili ŭchił da relihii, da viery ŭ Boha, i ŭ toj ža čas Vy ŭ apazycyi režymu, jakomu carkva addana prysłužvaje. Ja nie adnojčy čuŭ, jak pravasłaŭnyja cerkvy ŭ Miensku ludzi nazyvajuć «Muraŭjoŭkami». Ci nia ličycie VY, što čałaviek va ŭładzie pavinien być roŭnaaddaleny ad usich relihijnych kanfesijaŭ. I druhoje pytańnie. Vy šmat razoŭ kazali: «Jakim sudom sudzicie, takim sudzimy budziecie». Ale ž tady novaja ŭłada stanie praciaham ciapierašniaha režymu. Ci nia lepš było b pry źmienie ŭłady sudzić pa zakonu? Z pavahaj da Vas”.
— Biełaruskaje Adradžeńnie biaz viery ŭ Boha – niemahčymaje.
Pazycyja Biełaruskaha Ekzarchatu RPC u dačynieńni da siońniašniaha režymu i Maskvy – nie takaja adnaznačnaja, jak Vam zdajecca (pra što śviedčyć viadomy artykuł Rubinava, admova ad supracoŭnictva z Azaronkam i Čartovičam, a taksama sytuacyja vakoł chramu Suvorava). Biełaruskaje pravasłaŭje u Biełarusi pavolna i ciažka, ale adnaŭlajecca.
— Sp. Pavał, jakija novyja formy hramadzianskaha supracivu možna zaraz ŭkaranić u našu baraćbu?
— Na moj pohlad, najbolš efektyŭnaja forma pracy zaraz – dośvied chryścijanskaj demakratyi, sustrečy ŭ siamiejnym kole, u pryvatnych damoch, u nievialikich hrupach viernikaŭ, admysłoŭcaŭ, zacikaŭlenych. Najbolš mocnyja i rozhałasnyja akcyi ciapier – heta akcyi salidarnaści. Prykładam, kali u miastečku tysiača čałaviek za apošnija 10 hadoŭ padpisvałasia za demakratyčnych kandydataŭ u prezydenty, u deputaty, -- stvarajecca baza źviestak, i kožnamu z hetaj tysiačy ŭ vypadku, kali niešta zdarajecca z adnym, telefanujuć, zaklikajučy vyjavić salidarnaść (pryjści, padtrymać maralna ci materyjalna). Adzin za ŭsich – usie za adnaho! Na miascovym uzroŭni heta asabliva važna.
— Musicie bierahcy siabie. Budzcie razumniejshymi, chitrejshymi, bols abaclivymi za rezym. E.,Vilnia
— Tych, chto zaraz zmahajecca za Biełaruś, bieraže Sam Boh. A zmahańnie – heta nia prosta hulnia, dzie pieramahaje chitrejšy ci razumniejšy. Zmahańnie – heta adkaznaść, achviarnaść, i ŭrešcie, kryž, dadzieny kožnamu z nas.
