Abmierkavańnie spravazdačy ab acency ŭździejańnia na navakolnaje asiarodździe (AUNA) Biełaruskaj AES z udziełam litoŭskich hramadzian prachodzić 17 žniŭnia ŭ Astraŭcy (Hrodzienskaja vobłaść), dzie ŭzvodzicca atamnaja stancyja.
Dla ŭdziełu ŭ mierapryjemstvie aficyjna zarehistravalisia 190 čałaviek, u tym liku 102 zacikaŭlenyja hramadzianiny ź Litvy, a taksama litoŭskija i biełaruskija śpiecyjalisty i žurnalisty. Adnak, jak rastłumačyli ŭ sakrataryjacie, nie ŭsie prysutnyja, hałoŭnym čynam miascovyja žychary, prachodzili praceduru rehistracyi.
U toj ža čas zała, jakaja źmiaščaje bolš jak 400 čałaviek, zapoŭnienaja praktyčna całkam.
U słuchańniach, jakija pačalisia kala 13 hadzin, taksama biaruć udzieł pieršy namieśnik ministra pryrodnych resursaŭ i achovy navakolnaha asiarodździa Biełarusi Vital Kulik, namieśnik ministra enierhietyki Michaił Michadziuk, dyrektar RUP «Biełndpienierhapram» Andrej Rykaŭ, zahadčyk łabaratoryi radyjacyjnaj biaśpieki Respublikanskaha
Na adkryćci hramadskich abmierkavańniaŭ Vital Kulik zajaviŭ, što da hetaha času Biełaruś praviała ŭsie pracedury pa Kanviencyi Espaa z susiednimi krainami, jakija chacieli ŭdzielničać u pracedurach, źviazanych z AUNA. «U 2010 hodzie ŭ Vilniusie adbylisia hramadskija abmierkavańni pa papiaredniaj spravazdačy AUNA, u ich uziali ŭdzieł 83 čałavieki. Paśla praviali kansultacyi pa dapracavanaj spravazdačy, składzienaj z ulikam abmierkavańnia, u Minsku. Takim čynam, my prajšli ŭsie pracedury z Kanviencyjaj Espaa», — skazaŭ jon.
Adnak, nahadaŭ čynoŭnik, Litva zajaviła ŭ kamitet pa vykanańni Kanviencyi Espaa, što Biełaruś abmierkavała tolki papiaredniuju, ale nie kančatkovuju AUNA, čym parušyła abaviazacielstvy. Kamitet parekamiendavaŭ aficyjnamu Minsku davieści da hramadskaści Litvy sutnaść kančatkovaj spravazdačy. Namieśnik ministra adznačyŭ, što niekalki razoŭ Biełaruś sprabavała davieści da litoŭskaj hramadskaści sutnaść kančatkovaj AUNA, adnak hetaha nie adbyłosia — Litva spasyłałasia na svaju zaniataść u suviazi sa staršynstvam u Jeŭrasajuzie.
Na praciahu troch hadzin udzielniki abmierkavańnia zasłuchajuć niekalki dakładaŭ ad stvaralnikaŭ AUNA, paśla čaho adbudziecca dyskusija.
Charakterna, što litoŭskija hramadskija arhanizacyi, u tym liku ekałahičnyja, pryniali rašeńnie bajkatavać słuchańni pa biełaruskaj atamnaj stancyi.Siarod ich — viadučyja litoŭskija hramadskija arhanizacyi: Ruch zialonych Litvy, «Athaja», Centr moładzi Litvy, Asacyjacyja ZALI.LT, a taksama partyja «Litoŭski sajuz sialan i zialonych». Jany zajavili, što nie płanujuć udzielničać u «insceniroŭcy hramadskich abmierkavańniaŭ» i źviarnulisia da biełaruskaha ŭrada z patrabavańniem spačatku spynić budaŭnictva AES i tolki zatym pravieści praceduru acenki ŭździejańnia na navakolnaje asiarodździe, jak hetaha patrabuje Kanviencyja Espaa.
- U siaredzinie lipienia hetaha hoda pasolstva Biełarusi ŭ Litvie abviaściła ab praviadzieńni 17 žniŭnia ŭ Astraŭcy słuchańniaŭ pa abmierkavańni AUNA budučaj AES z udziełam biełaruskich śpiecyjalistaŭ i pradstaŭnikoŭ litoŭskaj hramadskaści ŭ adpaviednaści z rekamiendacyjami kamiteta pa vykanańni Kanviencyi Espaa. Adnak pradstaŭniki Litvy zajavili, što dyskusija pa spravazdačy adbycca nie moža, bo zhodna z hetaj kanviencyjaj takija publičnyja sprečki mohuć pravodzicca tolki tady, kali z dakumientami poŭnaściu aznajomiacca ekśpierty zacikaŭlenych bakoŭ. Biełaruski bok, u svaju čarhu, vinavacić Litvu ŭ niehatovaści da kanstruktyŭnaha ŭzajemadziejańnia i śćviardžaje, što dała litoŭcam vyčarpalnyja adkazy na zadadzienyja imi pytańni. 13 žniŭnia ministr pa pytańniach navakolnaha asiarodździa Litvy Valencinas Mazuranis zajaviŭ, što Biełaruś sprabuje naviazać litoŭskamu boku «dyskusiju niamoha z hłuchim».
