Viciebskaha miedyka Pastnova nakiravali na prymusovaje lačeńnie 7

Viciebski lekar Ihar Pastnoŭ nakiravany na prymusovaje lačeńnie ŭ abłasny centr psichijatryi i narkałohii. Taki vierdykt vyniesła sudździa Viciebskaha rajona Taćciana Dziehciarova na pasiadžeńni 21 žniŭnia, paviedamiŭ BiełaPAN pravaabaronca Leanid Śviecik.

Pavodle jaho słoŭ, rašeńnie pryniata na padstavie zaklučeńnia ŭračebna-kansultatyŭnaj kamisii i sa zhody abłasnoj prakuratury. Pastnoŭ padlahaje štomiesiačnamu ahladu ŭ UKK na pradmiet dalejšaha lačeńnia.

Sud adbyŭsia ŭ adsutnaść Pastnova, jaki znachodzicca ŭ psichijatryčnym centry, jaho advakata i pradstaŭnika prakuratury. Były lekar abmiežavany ŭ pravach: jon nie moža prymać pasyłki, naviedvalnikaŭ, ździajśniać telefonnyja zvanki, vieści pierapisku. «Takija žorstkija miery naściarožvajuć, bo jany prymianiajucca ŭ vypadku, kali realizacyja hetych pravoŭ niasie pahrozu pacyjentu i / abo navakolnym», — skazaŭ pravaabaronca.

Pastnoŭ maje 10 dzion dla abskardžańnia rašeńnia suda, adnak, adznačyŭ Śviecik, ciažka ŭjavić, jak heta možna zrabić pry takim abmiežavańni pravoŭ. Jon taksama padkreśliŭ, što da hetaha času źjaŭlajecca tajamnicaj dyjahnaz, pastaŭleny lekaru.

Pavodle infarmacyi pravaabarončaha resursu spring96.org, Pastnoŭ apynuŭsia na lačeńni ŭ psichijatryčnaj balnicy paśla apošniaha videavystupleńnia ŭ internecie. Jon vykazaŭ krytyčnyja mierkavańni ab stanie viciebskaj miedycyny, prymusovym kadavańni ad ałkahalizmu, a taksama pra toje, što jaho samoha zapałochvajuć prymusovym psichijatryčnym lačeńniem.

16 žniŭnia Pastnova zabrali ŭ lakarniu prosta z pracy. Zdabyć infarmacyju pra Pastnova składana jašče i tamu, što ŭ jaho niama svajakoŭ.

«Ihara Pastnova ŭ hetym špitali dobra viedajuć: pa ironii losu jon tut ža pracavaŭ lekaram-psichijatram. Da taho jon byŭ dziciačym lekaram, tak jak maje dźvie śpiecyjalnaści. Ale z hetaj pasady jaho zvolnili, nie praciahnuŭšy kantrakt. Usie hetyja prablemy, na dumku Pastnova, źviazanyja ź jaho hramadskaj pazicyjaj — z tym, što jon adkryta krytykavaŭ i kiraŭnictva vobłaści, i kiraŭnictva abłasnoj sistemy achovy zdaroŭja, u tym liku praź niezaležnyja ŚMI i videazvaroty na internet-partale youtube «, — adznačajuć pravaabaroncy.

Dźmitryj Ułasaŭ, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH