Dramaturh Andrej Karelin zvolnieny z Novaha dramatyčnaha teatra.
U mai hetaha hoda na forumie partała tut.by Karelin pakinuŭ dva niehatyŭnyja kamientary na adras biełaruskaj milicyi, za što ŭ dačynieńni da jaho byŭ raspačaty administracyjny praces pa dvuch artykułach KoAP Respubliki Biełaruś — 23.5 (abraza słužbovaj asoby pry vykanańni joj słužbovych paŭnamoctvaŭ) i 9.3 (abraza). U lipieni dramaturh byŭ aštrafavany na 10 młn. rubloŭ, adnak potym hetu sumu skaracili da 7 młn. rubloŭ.
Paźniej Karelin pajšoŭ u adpačynak, a paśla viartańnia ź jaho 26 žniŭnia adpraviŭsia da dyrektara teatra Vasila Marcieckaha dla vyrašeńnia rabočych pytańniaŭ, adnak toj paraiŭ jamu napisać zajavu ab zvalnieńni,raskazaŭ dramaturh. Pavodle słoŭ Karelina, Marciecki raskazaŭ jamu, što ŭ teatr patelefanavali z Hałoŭnaha ŭpraŭleńnia ideałahičnaj pracy, kultury i pa spravach moładzi Minharvykankama i zapatrabavali zvolnić dramaturha.
«Ja nie ryzyknuŭ padvodzić čałavieka pad manastyr i spyniać jaho karjeru, tamu ja napisaŭ zajavu pra sychod, razumiejučy, što kali hutarka zajšła tak, to pryčyna dla majho zvalnieńnia ŭ hetaj krainie zaŭsiody znojdziecca», — raskazaŭ dramaturh. Karelin prapracavaŭ u Novym teatry mienš jak hod — z 26 vieraśnia 2012 hoda. Pavodle jaho słoŭ, u lipieni dyrektar teatra napisaŭ jamu stanoŭčuju charaktarystyku dla suda, a taksama padpisaŭ zajavu ab pradaŭžeńni kantrakta na dva hady.
Ciapier dramaturh znachodzicca ŭ pošukach novaj pracy i hatovy pracavać nie pa śpiecyjalnaści. Akramia taho, dramaturh nie vyklučaje mahčymaj emihracyi ź Biełarusi. «Ja uziaŭ pad uvahu paradu dyrektara.
Jon skazaŭ, što mnie lepš pakinuć nie tolki teatr, ale i Biełaruś, tamu što dalej budzie tolki horš.Ja nie ŭpeŭnieny, što heta byli jaho słovy. Mnie zdajecca, što heta było pieradadziena ludźmi, jakija zapatrabavali majho zvalnieńnia», — skazaŭ Karelin.
Dyrektar Novaha teatra Vasil Marciecki, u svaju čarhu, śćviardžaje, što dramaturh zvolniŭsia sam 26 žniŭnia. Na pytańnie, ci źviazana zvalnieńnie Karelina z administracyjnym pracesam u dačynieńni da jaho,
Marciecki adkazaŭ, što znachodziŭsia ŭ adpačynku i «nie ŭ kursie taho, što adbyvałasia ŭ Minsku». Z upraŭleńnia ideałahičnaj pracy, pavodle słoŭ Marcieckaha, da jaho nichto nie źviartaŭsia.
«My zusim spakojna rasstalisia ŭ paniadziełak, jon napisaŭ zajavu. Da hetaha jon mnie z Maskvy telefanavaŭ, raskazvaŭ, što jon tam pracuje nad čarhovym sieryjałam i što sprabuje atrymać rasijskaje hramadzianstva. Ja napisaŭ jamu vielmi dobruju charaktarystyku i naohuł da jaho vielmi dobra staŭlusia. Jon vielmi dobry śpiecyjalist, i mnie ciapier budzie ciažka znajści inšaha», — skazaŭ jon.
