 |
Udzielniki duetu «Alaksandra i Kanstancin» narešcie pabralisia zakonnym šlubam paśla dzieviaci hod blizkaha znajomstva. «Tym samym my razburyli lehiendu pra toje, što my — brat i siastra», — žartujuć jany. Śviatkavańnie viasiella prajšło na chutary Šabli ŭ siabry dueta, kolišniaha dyrektara N.R.M. Uładzimiera Šablinskaha. A za niekalki dzion da viasiella «AiK» uziali ŭdzieł u festyvali Sunflower‑2007 ŭ Serbii.
Alaksandra Kirsanava apaviadaje, što śviatkavańni było vyrašana zładzić u formie oŭpen‑ejru:
«My doŭha viedajem adno adnaho, tamu adrazu ž pryjšli da vysnovy, što adznačeńnie projdzie biaź niejkich tam viasielnych standartaŭ, stałoŭ litaraj «P« dy inšaha».
Kanstancin Drapieza apaviadaje, što ŭ jakaści zabavaŭ dla haściej było prapanavana: jazda na džypach pa biezdarožžy, stralba z łuku dy konkurs krasamoŭstva.
«Dla haściej akrom tradycyjnych prysmakaŭ my prapanavali asablivy hatunak harełki, jakuju nazvali «Halilejeŭka«, u jakaści etykietki na plašcy była vokładka našaha eŭravizijnaha synhłu».
A da viasiella «Alaksandra i Kanstancin» paśpieli naviedać Serbiju, dzie vystupili z kancertam u miežach festyvalu Sunflower 2007, jaki tranślavaŭsia ŭ prostym etery pa miascovym nacyjalnym telebačańni. Alaksandru ŭraziŭ horad Biełhrad:
«Tam vielmi pryhožaja architektura, šmat starych budynkaŭ. Dy i serby da nas pastavilisia zvyšpryjazna — piacizorkavy hatel dy padvyšanaja ŭvaha da našych personaŭ». A Kanstancina ŭraziła tamtejšaja kuchnia: «Takich vialikich adbiŭnych, jak u Serbii ja jašče nie bačyŭ! Da ŭsiaho tam stolki vidaŭ bulbianoha harniru! A jašče biełarusaŭ nazyvajuć bulbašami».
