Eksperty śledča‑aperatyŭnaj hrupy vyjavili na ciele dziaŭčyny šmatlikija nažavyja ranieńni, paviedamlajecca na sajcie Haradzienskaha UUS. Adnoj z asnoŭnych rabočych versijaŭ, vysunutych aperatyŭnikami, stała zabojstva z metaj uzbahačeńnia. Śledčyja nie znajšli śladoŭ uzłomu pamiaškańnia, padjezd domu abstalavany damafonam. Usio heta navodzić na dumku, što achviara była znajomaja sa svaimi zabojcami i sama im adčyniła dźviery.
U vyniku apytańnia śviedkaŭ vyjaviłasia, što pierad domam zabitaj paŭdnia taŭklisia dvoje «chimikaŭ» 1986 i 1987 hadoŭ naradžeńnia. adzin ź ich byŭ znajomy ź dziaŭčynaj. Maładzionaŭ zatrymali. U chodzie dopytu jany pryznalisia, što viedali pra vialikuju sumu valuty, što zachoŭvałasia na kvatery ichniaj achviary. Śledčyja nie vyklučajuć, što padazravanyja zahadzia planavali zabojstva. Raspačataja kryminalnaja sprava pavodle č.2 art. 139 («Zabojstva»).
Haradzienski błoh s13.ru paviedamlaje niekatoryja padrabiaznaści nadzvyčajnaha zdareńnia. Nibyta rabaŭniki vynieśli z kvatery sejf, ale zdoleli pranieści jaho niekalki pavierchaŭ, a paśla kinuli jaho i źbiehli. Niedaloka, praŭda.
U suviazi z hetym zabojstvam u Horadni zhadvajuć žudasnuju historyju siaredziny 1990‑ch. U mikrarajonie Višniaviec baćki znajšli zabitaj svaju maleńkuju dačku. Hetak rabaŭnik pazbaviŭsia ad śviedki. Pobač znajšli skryvaŭlenaha ščaniuka, jaki da apošniaha baraniŭ svaju maleńkuju haspadyniu.
