Milicyja Kastryčnickaha rajona Minska zaviała kryminalnuju spravu ab parušeńni paradku adbyćcia chatniaj «chimii» suprać Rusłana Mirzojeva, aŭtara videarolikaŭ pra MAZ i minski mikrarajon Kurasoŭščyna.
«Tak, zaviali spravu na Rusłana. Jamu pra heta ŭčora paviedamili ŭ milicyi. Paśla taho jak jon adbyŭ 7 sutak na Akreścina ŭ žniŭni, usio nibyta išło narmalna, a tut raptam skazali, što zaviedzienaja sprava!» — paviedamiła žonka Rusłana Mirzojeva Marjam.
Telefon samoha Rusłana Mirzojeva ciapier maŭčyć. Raniej Mirzojeŭ paviedamiŭ, što za im ličycca ŭ milicyi 5 parušeńniaŭ, pra jakija jon daviedaŭsia niadaŭna i niečakana, i što zaraz jamu pahražajuć 3 hady realnaha źniavoleńnia.
Taksama Rusłan Mirzojeŭ skazaŭ, što nie robić ciapier krytyčnych videafilmaŭ, ale całkam ad tvorčaści nie admoviŭsia i zdymaje «humarystyčnyja roliki».
Uletku Rusłana Mirzojeva zvolnili z MAZa, pra jaki jon źniaŭ videaroliki i vykłaŭ u interniecie. Paśla źjaŭleńnia novych videarolikaŭ pra narkamanaŭ i maładych złačyncaŭ u Kurasoŭščynie ŭ žniŭni Rusłan Mirzojeŭ byŭ zatrymany milicyjaj i asudžany na 7 sutak aryštu nibyta za niepadparadkavańnie milicyi. Bolš za hod tamu Rusłan Mirzojeŭ byŭ asudžany za kradziež i adbyvaŭ za heta «chatniuju chimiju».