U Biełarusi nie čakajecca surovaj zimy, paviedamiła BiełTA hałoŭny sinoptyk Respublikanskaha hidramieteacentra Ludmiła Paraščuk.
«U Biełarusi zimoj tempieraturny fon budzie adpaviadać siarednim šmathadovym značeńniam, tak što kazać pra niezvyčajna surovuju zimu, jakoj nie było ŭ Jeŭropie bolš za 100 hadoŭ, pakul nie vypadaje», — skazała Ludmiła Paraščuk.
U śniežni ŭ Biełarusi čakajecca siaredniaja tempieratura ad minus 2 da minus 5 hradusaŭ, u lutym — 4–8 hradusaŭ nižej za nul.
U studzieni siaredniaja tempieratura pavietra miarkujecca krychu vyšej za klimatyčnuju normu, jakaja składaje 5–8 hradusaŭ marozu.
Pavodle hałoŭnaha sinoptyka, klimatyčnyja abo siezonnyja prahnozy va ŭsim śviecie znachodziacca ŭ stadyi navukovaha pošuku, ich spraŭdžanaść jašče nievialikaja — 60–70%. Raspracoŭkaj takich prahnozaŭ zajmajucca viadučyja suśvietnyja centry, abstalavanyja mahutnymi vyličalnymi mašynami.
U respublikanskim hidramieteacentry raspracoŭkaj siezonnych prahnozaŭ nie zajmajucca.
«My vykarystoŭvajem źviestki Paŭnočna-Jeŭrazijskaha klimatyčnaha centra, raźmieščanaha ŭ Maskvie. Analiz źviestak hetaha centra dazvalaje ź vierahodnaściu 68–70% zrabić toj ci inšy prahnoz», — adznačyła Ludmiła Paraščuk.
