30 vieraśnia ŭ Kijevie byŭ padpisany «Zvarot cerkvaŭ i relihijnych arhanizacyj da ŭkrainskaha naroda», u jakim havorycca: «Ciapier Ukraina staić pierad vybaram šlachu svajho dalejšaha raźvićcia. Na našu dumku, budučynia Ukrainy naturalna abumoŭlena našymi histaryčnymi karaniami - być niezaležnaj dziaržavaj u kole svabodnych jeŭrapiejskich narodaŭ.
Pierakananyja, što hety vybar nie źjaŭlajecca i nie moža ličycca supraćpastaŭleńniem Ukrainy našamu histaryčnym susiedu - Rasii. Bo jaje dziaržaŭnaść, historyja i kultura taksama ciesna źviazany ź Jeŭropaj. Spadziajemsia, što rasijski narod i dziaržava buduć pryznavać i pavažać prava Ukrainy, jak niezaležnaj dziaržavy, vybirać svoj šlach u budučyniu - tak ža, jak Ukraina pryznaje i pavažaje niezaležnaść i suvierenitet Rasijskaj Fiederacyi».
Zvarot padpisali pradstajaciel Ukrainskaj Pravasłaŭnaj Carkvy (Maskoŭskaha patryjarchatu) mitrapalit Uładzimir (Sabadan), kiraŭnik niepryznanaj Maskoŭskaj patryjarchijaj Ukrainskaj Pravasłaŭnaj Carkvy Kijeŭskaha Patryjarchatu Fiłaret, kiraŭnik Ukrainskaj Hreka-Katalickaj (unijackaj) carkvy Śviatasłaŭ (Šaŭčuk), hałoŭny rabin Ukrainy, staršynia Duchoŭnaha upraŭleńnia musulman Ukrainy, a taksama kiraŭniki baptysckaj, piacidziasiatnickaj dy inšych pratestanckich denaminacyjaŭ.
Maskoŭskija palitołahi byli ŭražanyja takim adzinstvam relihijnych dziejačoŭ u adstojvańni jeŭrapiejskaha vybaru Ukrainy. U Rasii raźličvali, što što UPC (MP) budzie stajać na varcie rasijskich intaresaŭ na Dniapry.
Biełaruskaja pravasłaŭnaja carkva maje ŭ paraŭnańni z ukrainskaj mienšuju stupień samastojnaści ŭ miežach Maskoŭskaha patryjarchatu. Hetaksama ŭ Biełarusi adsutničajuć razhalinavanyja struktury aŭtakiefalnaha pravasłaŭja, jakija jość va Ukrainie. U adroźnieńnie ad Ukrainy, u Biełarusi ŭ carkvie mała vykarystoŭvajecca nacyjanalnaja mova. Tak stałasia, što va Ukrainie UPC (MP) ad 1980-ch uznačalvaŭ ukrainiec, a biełaruskim pravasłaŭjem ad taho samaha času kiruje ŭradženiec Maskvy mitrapalit Fiłaret (Vachramiejeŭ).
