Biełaruskija palityčnyja emihranty ŭ Polščy vyrašajuć prablemu zarehistravanych u hetaj krainie «fundacyj».
U paniadziełak lidar hramadzianskaj kampanii «Jeŭrapiejskaja Biełaruś» Andrej Sańnikaŭ raspaŭsiudziŭ zajavu nakont taho, što Źmicier Barodka nie źjaŭlajecca bolš kaardynataram. Pryčynaj takoha kroku nazyvajecca «strata davieru». Padrabiaznaści hetaj spravy Andrejem Sańnikavym nie byli ahučanyja.
Źmicier Barodka ŭ hutarcy ź Jeŭraradyjo adznačyŭ, što škaduje z-za taho, što «nie zmoh damovicca ź ludźmi, ź jakimi pracavaŭ 12 hadoŭ».
Pavodle jaho słoŭ, sprava tyčycca «Biełaruskaha doma ŭ Varšavie» (Barodka źjaŭlajecca jaho sudyrektaram).
«2,5 hoda paśla viadomych padziej 19 śniežnia 2010 hoda ja vymušany byŭ pierajechać u Polšču. Tut ja zasnavaŭ dźvie fundacyi, adna ź jakich nazyvajecca «Jeŭrapiejskaja Biełaruś», a druhaja — razam z rucham «Za Svabodu» my stvaryli fundacyju «Biełaruski dom u Varšavie». Kali lidary «Jeŭrapiejskaj Biełarusi» Źmicier Bandarenka i Andrej Sańnikaŭ vyjšli na volu, jany paprasili mianie addać «Jeŭrapiejskuju Biełaruś» i «Biełaruski dom» u Varšavie.
Ź pieršym ja absalutna zhodny, nie maju nijakich pravoŭ na hety brend. I ja raspačaŭ praceduru pa pieraafarmleńni dakumientaŭ. I ja addaju brend «Jeŭrapiejskaja Biełaruś» Sańnikavu i jaho kamandzie».
Ale addavać «Biełaruski dom» pad kantrol «Jeŭrapiejskaj Biełarusi» Barodka nie choča. Pavodle jaho słoŭ, ad pačatku było vyrašana, što heta musić być centr roznych biełaruskich palityčnych i hramadskich arhanizacyj, «dla ŭsich biełarusaŭ, jakija znachodziacca pa-za jaje miežami».
