Urad Biełarusi čakaje rost realnych (z ulikam inflacyi) dachodaŭ nasielnictva na 6% u 2014 hodzie. Taki prahnoz praduhledžany prajektam dziaržrašeńnia ab zaćviardžeńni pakazčykaŭ sacyjalna-ekanamičnaha raźvićcia na 2014 hod.
Čakajecca, što pradukcyjnaść pracy ŭ nastupnym hodzie budzie ŭzrastać chutčej za zarpłatu rabotnikaŭ. Zhodna z prahnozam urada, pradukcyjnaść pracy ŭ 2014 hodzie pavialičycca na 9,4%.
Varta zaznačyć, što na 2013 hod urad taksama zakładvaŭ pieravyšeńnie tempaŭ rostu pradukcyjnaści pracy nad pavieličeńniem zarpłat. Tak, zhodna z aficyjnym prahnozam na 2013 hod, realnyja dachody nasielnictva pavinny byli ŭzraści na 6,5%, pradukcyjnaść pracy — na 9,3%.
Faktyčnaje vykanańnie nazvanych pakazčykaŭ adroźnivajecca ad prahnoznych značeńniaŭ. Zhodna sa źviestkami za studzień—lipień 2013 hoda, realnyja dachody nasielnictva pavialičylisia na 19,1%, a pradukcyjnaść pracy — tolki na 2,5%.
Takim čynam, utvaryŭsia značny razryŭ u tempach rostu pradukcyjnaści pracy i realnaj zarabotnaj płaty.
Jak paviedamlałasia raniej, rost zatrat pramysłovych pradpryjemstvaŭ sioleta ŭ mnohim źviazany z pavieličeńniem zarpłat. Zhodna sa statdanymi, za pieršuju pałovu hetaha hoda vydatki biełaruskich pradpryjemstvaŭ na vytvorčaść pradukcyi (rabot, pasłuh) pavialičylisia na 15,4% u paraŭnańni z anałahičnym letašnim pieryjadam.
Pry hetym, zaznačaje Biełstat, u pieršym paŭhodździ 2013 hoda ŭ paraŭnańni sa studzieniem—červieniem 2012 hoda adbyłosia źmianšeńnie doli materyjalnych vydatkaŭ pry pavieličeńni ŭdzielnaj vahi na apłatu pracy ŭ ahulnym abjomie raschodaŭ pradpryjemstvaŭ na vytvorčaść pradukcyi.
Tak, dola materyjalnych vydatkaŭ źniziłasia z 71,9% u pieršym paŭhodździ 2012 hoda da 65,5% za anałahičny pieryjad hetaha hoda.
Udzielnaja ž vaha vydatkaŭ pradpryjemstvaŭ na apłatu pracy pavialičyłasia z 13,1% u pieršym paŭhodździ 2012 hoda da 16,9% u studzieni—červieni 2013 hoda.
Zhodna z aficyjnymi statźviestkami, materyjalnyja vydatki pradpryjemstvaŭ na vytvorčaść pradukcyi ŭzraśli ŭ najaŭnych cenach u siarednim na 5,2%. Vydatki na apłatu pracy ŭ pieršym paŭhodździ 2013 hoda ŭ paraŭnańni z anałahičnym letašnim pieryjadam uzraśli na 49,1%.
Varta taksama zaznačyć, što sioleta ŭzrasła dola raschodaŭ na apłatu pracy ŭ vyručcy pradpryjemstvaŭ. Zhodna z aficyjnaj statystykaj, dola siaredniamiesiačnaj zarpłaty ŭ siaredniamiesiačnaj vyručcy na adnaho rabotnika skłała ŭ pieršym paŭhodździ 2013 hoda 11,2% suprać 8,4% za anałahičny pieryjad 2012 hoda.
