Paśla vykanańnia misii na pasadzie emisara MZS Siarhiej Hajdukievič, adčuvajecca, uloh u pieradvybarčyja kłopaty. U pryvatnaści, znoŭ zavioŭ havorku pra imaviernaść pierachodu na źmiešanuju systemu pry vybarach u Pałatu. Musić, jość niejkija vyciečki infarmacyi (ci dezinfarmacyi).
Štab ADS, sa svajho boku, pryśpiešvaje farmavańnie adzinaha śpisu (pry tym što šancy jaho skłaści nadta ćmianyja). Kažuć, što mahčymaja daterminovaja kampanija. A što, zładzić jaje pad šumok aperacyi "Pierajemnik" u Rasiei — zručny dla ŭładaŭ varyjant.
Na dumku palitolaha Jurasia Čavusava, naviersie kali i pojduć na źmienu vybarčych parametraŭ, to zadaduć nia bolej za adnu novuju opcyju. Abo-abo: ci daterminovyja vybary pa staroj schiemie — vyklučna pa akruhach, ci — pavodle praparcyjna-mažarytarnaj systemy, ale tady tolki praz hod uvosień. Inačaj moža pierahrecca pasłuchmianaja, adnak niepavarotlivaja vertykal.
Łukašenka, adčuvajecca, nie daviaraje navat kiravanamu partyjnamu budaŭnictvu. Imitacyja mižpartyjnaj kankurencyi za mandaty patrebnaja chiba što napakaz Eŭropie. Ale fakt toje, što buduć "pryzy ŭ studyju". I palityčny niuch Hajdukieviča pracuje. ŁDP zapasajecca papularnymi tvarami. U partyju pryniali viadomaha komika Kryžanoŭskaha. Mała chto ŭžo pamiataje: aktor sprabavaŭ balatavacca na prezydenckich vybarach 2001 hodu. Ale vyśvietliłasia, što jon nie adpaviadaje zakanadaŭčamu patrabavańniu być biełaruskim hramadzianinam pavodle naradžeńnia. U paryvie emocyjaŭ artyst nazvaŭ tady hetu normu dyskryminacyjnaj i ŭvohule vykazvaŭsia davoli śmieła. Vo jakaja była jašče demakratyja!
…Pamiataju, u 1979-m, studentam žurfaku, ja zrabiŭ z maładym artystam Kupałaŭskaha teatru Jaŭhienam Kryžanoŭskim interviju dla "Čyrvonaj źmieny". Jon tady z honaram adznačyŭ, što atrymaŭ hałoŭnuju rolu ŭ vadevili "Mikitaŭ łapać".
A niadaŭna ŭ interviju radyjo "Svaboda" pastaleły Kryžanoŭski filazafična razvažaŭ: "Palityka — heta toj samy teatar: ź dziejnymi asobami, z masoŭkaj; toje, što kažuć "karala hraje śvita". Jak Šekśpir kazaŭ: uvieś śviet — teatar, a ludzi ŭ im aktory. I Toni Błer byŭ takim samym aktoram, jak i Jelcyn, Harbačoŭ, Hitler, Neron. Heta ŭsio artysty".
Jak bačym, nieŭzabavie ŭ biełaruskim palityčnym teatry moža pačacca novaja dzieja. Chaj sabie scenar napisany viadoma dzie, ale padobna na toje, što ŭžo źjaŭlajecca popyt na tvary, trochi adroznyja ad namenklaturnaha typažu. U Rasiei heta praces daŭno pajšoŭ. Pra Ameryku i kazać niama čaho. Prafesyjny aktor Rejhan zdoleŭ navat stać prezydentam. Praŭda, tam palityčny teatar nia tak padobny da kałhasnaha klubu.
