Ničoha nie nahadvaje va Ŭkrainie pra atmasferu ekanamičnaha chaosu dy inšyja kataklizmy, jakija – kali vieryć «SB» i BT – paśla padziej na Majdanie stali permanentnym atrybutam ukrainskaha štodzionnaha žyćcia. 26 sakavika pra vybary nahadvali chiba vielizarnyja čerhi la škołaŭ i administracyjnych budynkaŭ, pieratvoranych u pieravybarčyja «dilnyci».
Ale jašče ŭ piatnicu, 24 sakavika, Kijeŭ nahadvaŭ lahier namadaŭ: la kožnaj stancyi metro i kožnaha supermarkietu byŭ svoj maleńki Majdan: pałatkavy lahier pradstaŭnikoŭ roznych palityčnych siłaŭ. Kožny, chto zahladaŭ u namiot, atrymlivaŭ ad prapahandystaŭ stos papiarovaj infarmacyi ab prahramie partyi, jaje liderach, a taksama bonus-kalandaryk abo pakiet. Najbolšaj papularnaściu karystalisia ahitkropki Julii Cimašenki, dzie akramia makulatury možna było zatarycca šalikam abo kapturkom z «čyrvonym sercam» – łejbłam jaje bloku.
U subotu ŭvieś hety cyrk źnik – va Ŭkrainie byŭ «dzień cišyni». Zastalisia vyklučna hrafici – kštałtu «Za Kamunistaŭ. Davi hidru» – dy kalarovyja stykiery na drevach. Bo kožnaja partyja maje svaju farbu: sacyjalisty – ružovyja, «rehijony» – fijaletavyja, «Naša Ŭkraina» – pamarančavaja, kaniečnie. Ale vybarčaja kampanija praciahvałasia i ŭ subotu. Ukraincy dadumalisia da cikavych pijarnych krokaŭ. Naprykład, trasy horadu ŭpryhožvajuć bihbordy sa słohanam «zialonyja». Kali padyści bližej, možna pračytać, što «zialonyja» – novy medpreparat, jaki chutka pavinien źjavicca ŭ aptekach. A toje, što jon vyklikaje asacyjacyi z nazvaj niejkaj partyi, – «čystaje supadzieńnie». Toje ž robiać inšyja palityčnyja aktory. Tak, u horadzie ciapier šmat reklamy piva «Abałoń», a ŭsie ž viedajuć, što dyrektar hetaj kampanii spansuje nacyjanalistaŭ ź bloku «Kastenka–Plušča». A belhijskija homaseksualisty abvinavacili Ju.Cimašenku ŭ parušeńni aŭtarskich pravoŭ: byccam jana «śpijaneryła» ŭ ich łejbł-serca. Było j niaśmiešnaje: uviečary ŭ subotu ŭ Daniecku nieviadomyja zabili deputatku «Našaj Ukrainy».
Tym nia mienš hradus napružanaści ŭ subotu trochi spaŭ, i ńjusmejkieram stała Biełaruś. Za dva dni ŭ Kijevie adbylisia čatyry akcyi salidarnaści ź biełaruskaj apazycyjaj – try kala ambasady i adna kala ofisu MZS. Pikietčyki patrabavali nie puskać u krainu datyčnych da parušeńnia pravoŭ hramadzian biełaruskich čynoŭnikaŭ. «Chaj jany adpačyvajuć u Sočy», – kazaŭ adzin parubak u mehafon.
Meram Kijeva niečakana staŭ Leanid Čyrvaniecki – siabra sekty «Pasolstva Božaje». Adnym ź jaho najbližejšych siabroŭ – Sunkanmi Sandej Adeładžy, vajaŭničy pratestancki prapaviednik ź Nihieryi. Letaś padčas kijeŭskaha maršu za lehalizacyju marychuany jaho pastva sprytna razahnała manifestantaŭ. Dumajecca, pry novaj haradzkoj administracyi baraćba za čyściniu noravaŭ praciahniecca jašče z bolšaj siłaj.
Za hady demakratyi va Ŭkrainie vypracavałasia cikavaja formuła pavodzinaŭ u dzień narodnaha volevyjaŭleńnia. Jana čymści nahadvaje pavodziny 31 śniežnia. U dzień hałasavańnia zranku pryniata dobra adsypacca, kab potym nie prapuścić hałoŭnaha: vybarčych telemaratonaŭ. Ź dziaviataj viečara, kali źjaŭlajucca źviestki pieršych ekzyt-połaŭ, viadomyja palityki i analityki pa roznych studyjach až da druhoj nočy dajuć roznyja acenki. Słuchać ich źbirajucca pierad televizaram kampanijami, pad dobraje vino.
Hałoŭnaj sensacyjaj uviečary 26 sakavika byŭ tryjumf Ju.Cimašenki. Jaje blok nabiraŭ na niekalki adsotkaŭ bolej, čym davali ŭsie sacyjalahičnyja Kasandry. Sp.Julija prosta śviaciłasia z ekrana televizara, tym časam jak našaŭkraincy byli sumnyja, i navat vopli specyjalna zaprošanych u ofis «NU» «Voplaŭ Vidaplasava» nie ŭźniali ichniaha tonusu. Cimašenka karystajecca vialikaj padtrymkaj siarod žančyn i častki aranžavaha elektaratu, niezadavolenaha apartunizmam Viktara Juščanki, najpierš u sacyjalnaj palitycy. Hałoŭny lozunh prahramy bloku Cimašenki – spraviadlivaść.
