Alaksandr Łukašenka zapatrabavaŭ ad spartyŭnych čynoŭnikaŭ da čempijanatu śvietu pa chakiei, jaki projdzie ŭ Minsku ŭ mai 2014 hoda, stvaryć kamandu, u jakuju buduć adabranyja najlepšyja hulcy.
Pra heta kiraŭnik dziaržavy zajaviŭ 15 kastryčnika na naradzie pa pytańniach padrychtoŭki i praviadzieńnia čempijanatu, paviedamlaje pres-słužba prezidenta,
Jak adznačyŭ staršynia Biełaruskaj fiederacyi chakieja Jaŭhien Vorsin, z červienia nacyjanalnaj kamandaj kiruje kanadski śpiecyjalist Hlen Chenłan, jaho pamočnikami źjaŭlajucca biełaruskija treniery Eduard Zankaviec i Aleh Mikulčyk.
Pavodle słoŭ čynoŭnika, trenierskim štabam raspracavany płan padrychtoŭki spartsmienaŭ, sfarmiravany pašyrany skład z 45 chakieistaŭ: 4 ź ich hulajuć u paŭnočnaamierykanskaj chakiejnaj lizie, 28 — u Kantynientalnaj chakiejnaj lizie, u tym liku 16 — u minskim «Dynama», 4 — u Vyšejšaj lizie Rasii, 9 źjaŭlajucca debiutantami.
Vorsin padkreśliŭ, što ŭsie spartsmieny poŭnyja rašučaści vystupić za nacyjanalnuju kamandu. Pavodle jaho słoŭ, za 6 miesiacaŭ buduć praviedzieny čatyry etapy vučebna-trenirovačnych zboraŭ. «Hałoŭnaja zadača hetaha etapu — mabilizavać kalektyŭ, vykarystoŭvać usie technika-taktyčnyja napracoŭki, jakija my siońnia majem, zhurtavać kalektyŭ», — skazaŭ jon.
Jak adznačyŭ Vorsin, i trenierski štab, i fiederacyja chakieja ličać, što zadača vychadu kamandy ŭ čverćfinał čempijanatu ciažkaja, ale jaje realna vykanać. Jon taksama dadaŭ, što vyrašany ŭsie arhanizacyjnyja, finansavyja pytańni, kab nacyjanalnaja kamanda paśpiachova vystupiła na čempijanacie.
Dajučy acenku ciapierašniamu vystupleńniu biełaruskaha kłuba ŭ Kantynientalnaj chakiejnaj lizie, Łukašenka zajaviŭ:
«Nam patrebna hulnia, a nie boŭtańnie pa chvalach: tam vyjhrali, tam prajhrali, tam kryły apuścili. Niemahčyma hladzieć časam na niekatoryja hulni! Tamu pracujcie z kamandaj: nie tolki z trenierami, ale i hulcami».
Łukašenka taksama papiaredziŭ spartyŭnych čynoŭnikaŭ adnosna arhanizacyi pracy biełaruskich chakiejnych kłubaŭ u cełym: «Treba navodzić paradak! Hrošy pavinny iści tym, chto niepasredna daje karyść, chto zmahajecca, chto skača, chto biehaje».
