Alaksandr Łukašenka vielmi niezadavoleny tym, što terminy zdačy spartkompleksu «Čyžoŭka-Arena» zaciahvajucca.
Pra heta jon zajaviŭ staršyni Minskaha harvykankama Mikałaju Ładućku 15 kastryčnika na naradzie pa padrychtoŭcy da čempijanatu śvietu pa chakiei 2014 hoda, paviedamlaje pres-słužba prezidenta.
Pavodle słoŭ Ładućki, da 7 listapada budzie ŭviedzieny pieršy puskavy kompleks, a ŭ poŭnym abjomie «Čyžoŭka-Arena» budzie zdadziena ŭ ekspłuatacyju da 15 śniežnia.
Pavodle jaho słoŭ, usie asnoŭnyja raboty vykanany, zaviaršajecca azdableńnie fasadaŭ. Z 9 listapada naviedvalniki zmohuć karystacca pasłuhami prakatu kańkoŭ i ledzianoj placoŭki na małoj arenie, a taksama šmatfunkcyjanalnaj zały.
«Vy mnie trojčy abiacali zdać abjekt da 7 listapada i nie vykanali ŭłasnyja abiacańni! — zajaviŭ u adkaz Łukašenka. — My ž užo pieranosili terminy! I vydumali niejkija puskavyja kompleksy!
Heta vaša prava: vy možacie puskać pa troch, pa piaci kompleksach, ale da 7 listapada budaŭniki pavinny adtul pajści».
Jak paviedamiŭ staršynia Biełaruskaj fiederacyi chakieja Jaŭhien Vorsin, padčas inśpiekcyjnaha vizitu ŭ žniŭni pradstaŭnikoŭ Mižnarodnaj fiederacyi chakieja byli ŭzhodnienyja ŭsie techničnyja patrabavańni pa praviadzieńni matčaŭ čempijanatu. Pavodle mierkavańnia zamiežnych ekśpiertaŭ, «Minsk-Arena» adpaviadaje samym vysokim mižnarodnym standartam.
Pavodle jaho słoŭ, praca ŭsich słužbaŭ i technałahičnaha abstalavańnia «Čyžoŭka-Areny» budzie pratestavana padčas Kaladnaha chakiejnaha turniru na pryz prezidenta i respublikanskich spabornictvaŭ siarod dziaciej i padletkaŭ pa chakiei «Załataja šajba» na pryz kiraŭnika dziaržavy. Turniry projduć va ŭmovach, nabližanych da čempijanatu śvietu, adznačyŭ čynoŭnik.
Taksama Łukašenka pacikaviŭsia, jak vyrašajecca pytańnie z arhanizacyjaj parkovačnych miescaŭ. Jon źviarnuŭ uvahu na toje, što pad parkoŭki časova nieabchodna prystasoŭvać lubyja svabodnyja płoščy ŭ miescach praviadzieńnia hulniaŭ. «A budavać dadatkova niejkija miescy, jakija potym nam nie patrebnyja buduć, — my nie nastolki bahatyja, — skazaŭ jon. — Treba być bolš mabilnymi ŭ hetaj situacyi».
Ładućka zapeŭniŭ, što pytańnie z parkoŭkami vyrašajecca, paviedamlaje pres-słužba.
Akramia taho Łukašenka źviarnuŭ uvahu ŭdzielnikaŭ narady na arhanizacyju rekłamnaj kampanii. Pavodle jaho mierkavańnia, da hetaha pracesu nieabchodna pryciahvać tych śpiecyjalistaŭ i tyja kampanii, jakija pryniasuć najbolšy efiekt.
«Nie baču nijakich prablem z padrychtoŭkaj da čempijanatu śvietu. I navat z raźmiaščeńniem haściej. Dumaju, pryvatniki achvotna padklučacca i zachočuć na hetym zarabić», — zajaviŭ kiraŭnik dziaržavy.
«Hałoŭnaje — biaśpieka. Treba, kab byŭ paradak. I heta nie značyć, što my pavinny chapać usich i kudyści nieści, vieźci, — skazaŭ Łukašenka.
— My haścinnyja ludzi. Treba z dušoj i pa-čałaviečy padyści da tych ludziej, jakija pryjeduć».
