 Uha Čaves |
Prezydent Venesueły Uha Čaves vyrašyŭ z paniadziełka pieravieści ŭsie hadzińniki na paŭhadziny nazad.
Čaves vyrašyŭ stvaryć svajo asobnaje «venesuelskaje časovaje vymiareńnie» z metaju pavialičyć pracazdolnaść hramadzian. Pa jaho słovach, hetyja źmieny nieabchodnyja, kab u venesuelcaŭ «abmien rečyvaŭ u mazhach palapšaŭsia ŭ ranišni čas, dziakujučy soniečnamu śviatłu». Čaves ličyć, što «školniki zaraz zmohuć pračynacca pry dzionnym śviatle, a kłaścisia da pryciemkaŭ».
Adkazvajučy na jašče nie prahučaŭšaje pytańnie, Čavies zajaviŭ žurnalistam:
«Mnie abyjakava, što paśla maich prapanoŭ mianie buduć ličyć varjatam. Chaj kažuć, što chočuć.»
Šmat chto z venesuelcaŭ ličyć pieravod strełak na paŭhadziny nazad dobraj idejaj, adnak chutkaść časavaj reformy i adsutnaść dastatkovych tłumačeńniaŭ pakul vyzyvajuć sumnievy ŭ niekatorych hramadzian. Navat najbližejšy paplečnik Čavesa, namieśnik ministra planavańnia Łuis Markano Hanzales vykazaŭsia za pieranos reformy na paru tydniaŭ paźniej, «adnak usie ŭ rukach prezydenta».
Susiednija krainy pakul nie adreahavali na novaŭvodziny Čavesa. Adnak vidavočna, što na źniešnija ekanamičnyja stasunki «venesuelski čas» paŭpłyvaje admoŭna.
Raniej Čaves unios na razhlad parlamentu novy prajekt kanstytucyjnaj reformy. Jon prapanoŭvaŭ dazvolić prezydentu pieravybiracca na svoj post nieabmiežavanuju kolkaść razoŭ, pavialičyć prezydencki termin z šaści da siami hadoŭ, a pracoŭny dzień skaracić da šaści hadzin.
Aproč taho, lepšy siabra Łukašenki prapanavaŭ uvieści ŭ krainie čaćviertuju halinu ŭłady — «saviety kamuny». Jon taksama źmianiŭ nazvu dziaržavy na «Balivaryjanskaja Respublika Venesueła», pamianiaŭ dziaržaŭny ściah i hierb..
Jak ličyć Čaves, novaŭvodziny dazvolać jamu «adkryć novuju eru ŭ zbudavańni sacyjalistyčnaj Venesueły» i praduchilić «spaŭzańnie krainy da kapitalizmu».
