Samit kiraŭnikoŭ krain SND, jaki prajšoŭ 24—25 kastryčnika, prymaŭ Pałac Niezaležnaści, dabudavany ŭ centry Minska.
Alaksandr Łukašenka nieadnarazova śćviardžaŭ, što heta nijakaja nie rezidencyja, adnak paśla pryznaŭsia, što budzie mieć u joj svoj kabiniet. Na fasad šykoŭna azdoblenaha budynka naniesieny nadpis, jaki nie pakidaje miesca śpiekulacyjam: «Rezidencyja prezidenta».
Pałac Niezaležnaści zaniaŭ pačesnaje miesca ŭ druhim dziasiatku rezidencyj, prynamsi, z tych, pra jakija viadoma hramadskaści.
«Naša Niva» nahadvaje pra astatnija ź ich. Pad rezidencyjaj my razumiejem miescy pražyvańnia i pracy kiraŭnika dziaržavy, a taksama miescy, u jakich prymajucca aficyjnyja zamiežnyja delehacyi.
Hetyja abjekty absłuhoŭvajucca kampanijaj «Dypservis», jakaja ŭvachodzić u strukturu Administracyi prezidenta.
Razmach «Drazdoŭ»
Samaj hałoŭnaj rezidencyjaj, stałym miescam žycharstva Alaksandra Łukašenki, źjaŭlajucca «Drazdy» na ŭskrajku Minska, nazvanyja ŭ honar adnajmiennaha vadaschovišča.
«Drazdy» paśpieli stać imiem nazoŭnym.
Heta simvał łukašenkaŭskaj ułady — ahromnistaja rezidencyja pasiarod lesu, nahłucha zakrytaja ad vypadkovych naviednikaŭ, i kompleks ź niekalkich dziasiatkaŭ katedžaŭ niepadaloku.
U im pasialilisia ministry i ŭpłyvovyja biznesmeny.
Što ŭjaŭlajuć saboj łukašenkaŭskija «Drazdy»? Heta kompleks bolš čym z paŭsotni raznastajnych zbudavańniaŭ.
Samaje hałoŭnaje — dom ahulnaj płoščaj bolš čym 2000 m2. Niaciažka zdahadacca, chto žyvie ŭ hetaj hramadzinie.
Dla aficyjnych pryjomaŭ abstalavanyja dva budynki pa 850 m2. Adnak daloka nie kožnaha zamiežnaha hościa Łukašenka zaprašaje da siabie ŭ «Drazdy» — jość i nie takija prestyžnyja rezidencyi.
Kali niechta ŭsio ž atrymaje taki honar, to pieranočyć jahonaja delehacyja zmoža ŭ śpiecyjalnym domie dla pryjezdžych, utraja mienšym za hałoŭny budynak.
Najbolšuju častku terytoryi rezidencyi zajmajuć žyłyja katedžy. Kali ŭhledziecca ŭ kartu, to možna naličyć bolš za 30 takich damoŭ. Jany zastalisia ad pasłoŭ, vysielenych u 1998. Heta nie tyja katedžy, jakija naležać namienkłaturnaj elicie. Čynoŭniki žyvuć za płotam, za niekalki kiłamietraŭ ad rezidencyi.
Asablivaja ŭvaha ŭ Drazdach nadadzienaja sportu.
Tut pabudavanyja spartkompleks (1000 m2) i basiejn (750 m2), paśla naviedańnia ich možna adpačyć u adnoj ź dźviuch łaźniaŭ.
Taksama ŭ rezidencyi jość asobnyja restaran, bar i bufiet. Adkrytaja navat svaja krama! A dla achovy zdaroŭja pieršaj asoby krainy pabudavanaja stancyja abiezžalezvańnia vady.
Cikava, što na terytoryi «Drazdoŭ» ustalavanyja dźvie anteny mabilnych apierataraŭ — «Viełkoma» i MTS. A voś «Łajf» nie ŭ pašanie.
Pryškolnaja rezidencyja
Druhaja žyłaja rezidencyja Łukašenki — «Aziorny», jaki znachodzicca ŭ Astrašyckim Haradku. U miascovaj škole vučycca małodšy syn kiraŭnika krainy Mikałaj.
U savieckija časy heta było lecišča maršała Cimašenki. Pierad «zasialeńniem» siudy Alaksandra Łukašenki była praviedzienaja rekanstrukcyja isnujučych zbudavańniaŭ, a taksama dabudavanyja novyja abjekty.
«Aziorny» raskinuŭsia amal na 90 hiektaraŭ, abniesienych vysokim płotam. Sama rezidencyja ŭjaŭlaje saboj trochpaviarchovy ŭmacavany cahlany budynak, płošča kožnaha paviercha składaje kala 500 m2.
Na terytoryi «Aziornaha» źviartajuć na siabie ŭvahu maleńki adnapaviarchovy čajny domik, pabudavany pa rasparadžeńni Łukašenki niekalki hadoŭ tamu, a taksama trochsiekcyjny elinh.
Elinh — heta śpiecyjalnaje zbudavańnie dla zachoŭvańnia vodnaha transpartu.
Kudy možna dapłyć z Astrašyckaha Haradka? Kali mierkavać pa karcie, to nikudy. Tolki nakrucić niekalki kołaŭ pa miascovym voziery.
Savieckaja spadčyna
Taki samy elinh pabudavany i ŭ haściavoj rezidencyi «Zasłaŭje» na bierazie Minskaha mora. Tutsama možna znajści i adnapaviarchovy spartkompleks na 700 m2.
Dla naviednikaŭ «Zasłaŭja» pabudavanyja niekalki karpusoŭ. Samy vialiki ź ich — trochpaviarchovik, udvaja bolšy za dom Alaksandra Łukašenki ŭ «Drazdach»! Nie našmat mienšyja i dva inšyja korpusy.
Zrešty, niekatoryja zamiežnyja hości spyniajucca na dvary — padčas vizitu ŭ Biełaruś były livijski dyktatar Muamar Kadafi raskłaŭ svoj šacior naŭprost pasiarod zasłaŭskaha łužka.
Kolišniaja rezidencyja Alaksandra Łukašenki znachodzicca za niekalki krokaŭ ad płoščy Pieramohi, na Vajskovym zavułku. Tut kiraŭnik dziaržavy žyŭ da zasialeńnia ŭ «Drazdy».
Niekalki hadoŭ tamu saviecki katedž byŭ pierarehistravany pad… hatel. Voś tolki pieranočyć tam prostamu turystu nie atrymajecca.
Baza adpačynku «Krupienina» za 30 km ad Viciebska — dva korpusy i niekalki VIP-katedžaŭ. Čas ad času jany prymajuć aficyjnyja delehacyi. Naprykład, u pačatku 2000-ch siudy pryjazdžali prezidenty Rasii i Ukrainy Uładzimir Pucin i Leanid Kučma. A niekalki hadoŭ tamu spyniaŭsia patryjarch Kirył.
U inšy čas u «Krupienina» moža spynicca luby achvotny. Samy prosty numar kaštuje kala $40, a darahi katedž — $530.
Chutar Viskuli na Pružanščynie ŭvajšoŭ u historyju jak miesca raspadu SSSR. Palaŭničaja siadziba nie karystajecca luboŭju Alaksandra Łukašenki. Hetaja rezidencyja adkrytaja dla naviednikaŭ. Ekskursanty, jakija pryjazdžajuć u Biełaviežskuju pušču, nie abminajuć i Viskuli.
Svoj uniosak
Rezidencyja ŭ Biarezinskim hidrałahičny zapaviedniku była pabudavanaja ŭžo pry Łukašenku. «Płaŭna» źjaviłasia ŭ 1998 niepadaloku ad vioski Vołava Hara. Letaś u joj prajšła rekanstrukcyja. Heta daloki ad šyku, akuratny trochpaviarchovy budynak, raźličany na 12 čałaviek. Jość saŭna, basiejn, biljard, plažny kompleks, restaran i navat viertalotnaja placoŭka. Z kožnaha naviednika voźmuć kala $70.
Źniać katedž na vaśmiarych pa susiedstvie budzie kaštavać kala $245. Mienavita tut nibyta žyŭ niekatory čas zrynuty kirhizski prezident Kurmanbiek Bakijeŭ.
Taksama na Viciebščynie znachodzicca brasłaŭskaja rezidencyja Łukašenki, dabudavanaja dva hady tamu. U jaje prosta tak nie patrapiš. Pavodle apisańniaŭ jaje naviednikaŭ, katedžy znachodziacca na terytoryi zakaźnika «Mižaziorny», pamiž aziorami Paŭnočny Vołas i Snudy.
Laskavičy — uzorny ahraharadok u Prypiackim nacyjanalnym parku na Pietrykaŭščynie. Tut žyvie mienš za 1000 čałaviek, zatoje jość svoj hatel.
A na bierazie Prypiaci pabudavali paleskuju rezidencyju Alaksandra Łukašenki. Niekalki maleńkich katedžaŭ i adzin budynak bolšaj płoščy dobra bačnyja z prahułačnych ciepłachodaŭ.
Ničyjny «Uschod»
U kožnaj ź pieraličanych rezidencyj kiraŭnik dziaržavy źjaŭlajecca tolki časovym haspadarom, bo ŭłaśnikam źjaŭlajecca Respublika Biełaruś. Adzinaje vyklučeńnie — zahadkavy kompleks «Uschod» u adnoj z zatokaŭ Minskaha mora. Tut bačnyja ŭsie prykmiety rezidencyi — uzbrojenaja achova, trochmietrovy płot, kamiery videanazirańnia na kožnym kroku. Tut zabaroniena nie tolki jeździć, ale navat i chadzić!
Znachodzicca «Uschod» pobač z rezidencyjaj «Zasłaŭje», aby-kamu tam budavacca nie dazvolili b. Pra svajo dačynieńnie da jaho nie zajaŭlaŭ nivodzin biełaruski ci zamiežny miljanier.
Miarkujučy pa spadarožnikavaj karcie, kompleks składajecca z troch vialikich budynkaŭ, kožny dla pražyvańnia asobnaj siamji, a taksama dźviuch mienšych chatak, basiejna i haspadarčych zbudavańniaŭ.
Absłuhoŭvać takuju płošču za svoj košt zadoraha, tamu zahadkavy ŭłaśnik pierakłaŭ hety abaviazak na pryvatnuju kampaniju.
***
Turystyčnyja «rezidencyi»
Asobnaj katehoryjaj možna ličyć ścipłyja bazy adpačynku i byłyja ŭradavyja leciščy, pieradadzienyja dla absłuhoŭvańnia prezidenckamu «Dypservisu».
«Ściapianku» možna znajści ŭ adnajmiennym minskim rajonie, niepadaloku ad Nacyjanalnaj biblijateki. Bolš za dziasiatak dačnych domikaŭ nibyta mohuć prymać turystaŭ, adnak častka ź ich zdajecca pad ofisy.
Haściničny kompleks «Krasnasielski» na 40 miescaŭ znachodzicca ŭ vioscy Rohava Minskaha rajona. Heta nakirunak Radaškovičaŭ. U składzie «Krasnasielskaha» — trochpaviarchovy hatel, a taksama try žyłyja damki.
U lesie na bierazie voziera znachodzicca i «Kryłova». Heta kala 30 km ad Minska, niepadaloku ad Zasłaŭja. Haściničnyja numary, łaźnia, tenisny kort — dla adpačynku padychodzić, ale dla pryjoma zamiežnych delehacyj vyhladaje nieprezientabielna.
Niadaŭna na bałans «Dypservisa» pieraviali i dom u škłoŭskaj Aleksandryi, dzie naradziŭsia Alaksandr Łukašenka. Heta zvyčajnaja draŭlanaja chata, abšytaja błokchaŭsam. Za jaje dziaržava zapłaciła miascovamu kałhasu $50 tysiač. Ekzatyčny hatel? Muziej? Pryznačeńnie chaty jašče nie vyznačanaje.
Spadčyna CK KPB
Staraja pracoŭnaja rezidencyja Alaksandra Łukašenki — usim viadomy «Čyrvony dom» u centry Minska. Za savieckimi časami na Marksa, 38 zasiadała kamunistyčnaja partyja, a ciapier — Administracyja prezidenta.
Šaścipaviarchovuju rezidencyju pačali budavać jašče da vajny, a skončyli tolki ŭ 1947.
***
Šyk i ścipłaść
Prezident Ukrainy Viktar Janukovič maje čatyry aficyjnyja rezidencyi, ź dziasiatak haściavych rezidencyj, a taksama niekalki leciščaŭ dla adpačynku ŭ Krymu. Šykoŭnuju rezidencyju «Mižhorje» niepadaloku ad Kijeva Janukovič zdoleŭ… pryvatyzavać.
U prezidenta Rasii Uładzimira Pucina, aproč Kramla, farmalna tolki try rezidencyi. Šmatlikija haściavyja damy ŭ rehijonach naležać miascovym uładam.
Kiraŭnik Polščy rasparadžajecca čatyrma rezidencyjami. Heta histaryčnyja budynki.
U prezidenta Łatvii taksama dźvie rezidencyi — u Ryzie i Jurmale. Adnak toj addaje pieravahu ŭłasnaj kvatery ŭ stalicy i svajmu viaskovamu domu.
Dźviuch rezidencyj — aficyjnaj i zaharadnaj — chapaje i prezidentu ZŠA Baraku Abamu.
