2 listapada ŭ Domie kultury pasiołka Aziory Hrodzienskaj vobłaści prajšli hramadskija słuchańni pa asušeńni bałota Śviatoje, paviedamlaje BiełaPAN.
Słuchańni pravodzilisia pa daručeńni pieršaha namieśnika premjer-ministra Biełarusi Uładzimira Siamaški.
Pavodle infarmacyi kampanii «U abaronu biełaruskich bałot», zaraz vyrašajecca los zakaźnika Hrodzienskaj vobłaści «Aziory», jaki chočuć urezać na 250 hiektaraŭ dla praciahu pracy torfabrykietnaha zavoda «Vierciališki», dzie zapasaŭ syraviny zastałosia maksimum na 10 hadoŭ.
Aprača miascovych žycharoŭ u słuchańniach uziali ŭdzieł deputaty, pradstaŭniki Minpryrody i Hrodnaabłvykankama, NAN RB, miascovych lashasaŭ, ekałahičnych NDA.
Prajekt pastanovy ab źmienie miežaŭ zakaźnika nie atrymlivajecca ŭzhadnić jašče ź viasny: acenka supracoŭnikaŭ Instytuta ekśpierymientalnaj bataniki imia V.F.Kupreviča NAN Biełarusi vyniesła zaklučeńnie ab niemetazhodnaści vyvadu hetaj terytoryi sa składu ziamiel zakaźnika, tym bolš z metaj torfaraspracovak.
Zhodna z daśledavańniami vučonych, nastupstvy torfazdabyčy buduć nieści za saboj vialikija straty. Raspracoŭka tarfianych radoviščaŭ pad Hrodna ŭžo pryviała da spuskańnia vady voziera Subotniaje (z-za panižeńnia ŭzroŭniu hruntovych vod). I chutka asušeńnie bałota Śviatoje pryviadzie da źniknieńnia azioraŭ Hliniec i Ščučynaje.
