Da vas źviartajucca žychary vioski Vialiki Bokaŭ Mazyrskaha rajona Homielskaj vobłaści. Mazyrskim rajvykankamam pryniata rašeńnie № 15 ad 2013/10/17 hoda ab uviadzieńni bufiernaj zony vakoł śvinafiermy ŭ v. Kozienki. U bufiernuju zonu ŭklučany vioski: Kozienki, Baryskavičy, Vialiki Bokaŭ, pasiołak Sasnovy. U lipieńskaj pastanovie Minsielhascharča № 30 paznačana, što za piać kiłamietraŭ ad kompleksu — nie fiermy, a mienavita kompleksu — zabaroniena ŭtrymańnie śviniej jak fizičnymi asobami, tak i fiermierskimi haspadarkami.
My razumiejem, što na kompleksach skancentravanaja vialikaja častka pahałoŭja i tam stvoranyja admysłovyja miery biaśpieki. Ale ŭtrymańnie Kozienskoj śvinafiermy nie padlahaje nijakaj krytycy. Tam navat narmalnych varotaŭ i płotu nie isnuje, nie kažučy ŭžo pra ŭmovy pracy śvinarak i mahčymaści vykonvać choć niejkija prafiłaktyčnyja mierapryjemstvy pa niedapuščeńni raspaŭsiudžvańnia epidemii afrykanskaj čumy śviniej.
Tam pa siońniašni dzień vykidajuć za płot zdochłych śviniej, miasa i kostki, jakich viaskovyja sabaki raściahvajuć pa ŭsim navakolli. A jašče treba ŭličvać, što kozienskija fiermy (dzie hadujuć bujnuju rahatuju žyviołu i śviniej) raźmieščany ŭ parušeńnie sanitarna-hihijeničnych i ekałahičnych patrabavańniaŭ.
Nasielnictvam nieadnarazova ŭzdymałasia hetaje pytańnie, ale voz i ciapier tam. U nas pra dabrabyt narodu kažuć tolki ŭ srodkach masavaj infarmacyi, dobra choć łozunhaŭ ŭžo nie raźviešvajuć. Rašeńnie rajonnymi ŭładami pryniata, ale, majučy na ŭvazie niešmatlikaje pahałoŭje śviniej na śvinafiermie, nichto nie pravioŭ analiz kolkaści pahałoŭja śviniej, jakich trymajuć žychary viosak u zonie karancinu.
Čamu znoŭ intaresy prostaha narodu nie pryniatyja da ŭvahi? Čamu kateharyčna ahavorany terminy źniščeńnia śviniej? Čamu nie dać ludziam, pry biezvyhulnym utrymańni śviniej, pry vykarystańni karmoŭ našaj vytvorčaści, padkarmić da viasny parasiat? Darosłych śviniej ludzi sa spakojnym sumleńniem zdaduć na miasapierapracoŭčyja kambinaty abo pierapracujuć dla siabie.
A jak być z suparosnymi śvinkami? Niaŭžo dziaržava, što tak «dbaje» ab dabrabycie naroda, nie mahła b abaviazać bujnyja śvinakompleksy stvaryć karancinnyja adździaleńni i paśla peŭnych daśledavańniaŭ prymać ad nasielnictva pa prymalnych cenach hetych śvinak?
U Homielskaj vobłaści jašče nie było zarehistravana nivodnaha vypadku afrykanskaj čumy śviniej, roŭna jak i ŭ Mazyrskim rajonie. Dyk navošta ž biez naža rezać ludziej? Ci miascovaj uładzie zachaciełasia jašče bolš padtrymać saŭhas-kambinat «Zara»? My dumajem, što ŭłada nie jeść miasa, jakoje vyhinajecca padčas smažańnia na patelni ad vialikaj kolkaści karmavych draždžej.
