Alaksandr Łukašenka prapanavaŭ stvaryć u Biełarusi «turkmienski astravok» ź internatami abo haścinicami dla studentaŭ z Turkmienistana.
Pra heta biełaruski kiraŭnik zajaviŭ padčas pieramovaŭ z prezidentam Turkmienistana Hurbanhuły Bierdymuchamiedavym ŭ Ašchabadzie 5 listapada, paviedamlaje dziaržaŭnaje infarmahienctva BiełTA.
Łukašenka padziakavaŭ Bierdymuchamiedavu za vysokuju acenku adukacyjnych pasłuh, što pradastaŭlajucca Turkmienistanu ŭ Biełarusi.
Na siońnia ŭ našaj krainie vučacca bolš za 8 tysiač turkmienskich studentaŭ.
Akramia taho, u suviazi z budaŭnictvam Harłykskaha horna-abahačalnaha kambinata viadziecca padrychtoŭka śpiecyjalistaŭ siaredniaha źviana.
«Kali heta budzie treba turkmienskamu boku, my budziem i dalej udaskanalvać hety praces. Vy skazali ab tym, što zacikaŭleny ŭ adkryćci padobnaha centra pa padrychtoŭcy śpiecyjalistaŭ siaredniaha źviana ŭ Turkmienistanie, — skazaŭ Łukašenka Bierdymuchamiedavu. — My hatovyja hety vopyt pieradać, tamu što całkam zachavali ŭ Biełarusi hety nakirunak».
Łukašenka padkreśliŭ, što supracoŭnictva ŭ humanitarnaj śfiery sadziejničaje ŭmacavańniu ŭzajemarazumieńnia i siabroŭskich adnosin pamiž narodami.
Jon taksama akcentavaŭ uvahu na supracoŭnictvie ŭ halinie kultury. Łukašenka, u pryvatnaści, zhadaŭ hastroli ŭ Biełarusi hrupy «Turkmienskija džyhity» Dziaržaŭnaha cyrka Turkmienistana.
Dasiahnuta damoŭlenaść ab čarhovym abmienie dniami kultury Biełarusi i Turkmienistana ŭ 2014-2015 hadach. Łukašenka ličyć, što handlova-ekanamičnyja adnosiny dźviuch krain raźvivajucca vielmi paśpiachova: «Daj boh, kab z usimi dziaržavami było tak. Za piać hadoŭ u piać razoŭ vyras tavaraabarot. Heta vielmi dobryja tempy dla našych krain».
«My i dalej budziem vielmi čujna reahavać na vašy prośby, rabić usio, što pažadaje turkmienski bok pa stvareńniu i raźvićciu sumiesnych vytvorčaściej jak u Biełarusi, tak i ŭ Turkmienistanie», — zapeŭniŭ Łukašenka.
Što tyčycca śfiery palityki i dypłamatyi, kiraŭnik biełaruskaj dziaržavy padkreśliŭ, što ŭ Biełarusi i Turkmienistana nikoli nie było na hety kont roznahałośsiaŭ, baki majuć adzinyja pohlady na mižnarodny paradak dnia i aktyŭna padtrymlivajuć adzin adnaho na placoŭkach roznych mižnarodnych arhanizacyj.
U svaju čarhu Hurbanhuły Bierdymuchamiedaŭ nahadaŭ, što ŭ hetym hodzie spoŭniłasia 20 hadoŭ z momantu ŭstanaŭleńnia dypłamatyčnych adnosin pamiž Biełaruśsiu i Turkmienistanam, i za hety pieryjad bakam udałosia mnohaje zrabić u raźvićci adnosin pa roznych nakirunkach.
U handlova-ekanamičnaj śfiery asnoŭnym prajektam prezident Turkmienistana nazvaŭ budaŭnictva Harłykskaha horna-abahačalnaha kambinata pa vytvorčaści kalijnych uhnajeńniaŭ.
Bierdymuchamiedaŭ zajaviŭ ab zacikaŭlenaści turkmienskaha boku ŭ dalejšym raźvićci supracoŭnictva ź Biełaruśsiu ŭ śfiery kultury, navuki, adukacyi.
