Deputaty pałaty pradstaŭnikoŭ na siońniašnim pasiadžeńni pryniali ŭ pieršym čytańni papraŭki ŭ Kodeks ab administracyjnych pravaparušeńniach, jakija praduhledžvajuć alternatyŭnuju padviedamasnaść pa spravach ab šerahu pravaparušeńniaŭ.
Alternatyŭnaja padviedamasnaść uvodzicca pa spravach ab takich pravaparušeńniach, jak drobny kradziež (artykuł 10.5 KoAP), drobnaje chulihanstva (artykuł 17.1 KoAP), raśpivańnie ałkaholnych, słabaałkaholnych napojaŭ ci piva ŭ hramadskim miescy albo źjaŭleńnie ŭ hramadskim miescy abo na pracy ŭ stanie apjanieńnia (artykuł 17.3 KoAP). Ciapier razhlad takich administracyjnych spraŭ znachodzicca ŭ kampietencyi sudoŭ.
Pry hetym, pavodle novaha zakonaprajekta, orhany MUS zmohuć tolki vynosić rašeńni ab štrafach, a nie prymać rašeńnie ab administracyjnym aryšcie.
Jak adznačyŭ, pradstaŭlajučy prajekt zakona ŭ parłamiencie, staršynia Viarchoŭnaha suda Valancin Sukała, u 2012 hodzie ŭdzielnaja vaha spraŭ ab takich pravaparušeńniach skłała 70% ad ahulnaj kolkaści spraŭ ab administracyjnych pravaparušeńniach.
«Zakanadaŭčaje nadzialeńnie pravam razhladu takich spraŭ orhanaŭ MUS daść mahčymaść pavysić apieratyŭnaść razhladu takich spraŭ, a taksama aptymizavać sudovuju nahruzku, skaracić kolkaść razhladanych sudami spraŭ ab administracyjnych pravaparušeńniach prykładna na 50—70 tysiač u hod», — skazaŭ Sukała.
U Pracesualna-vykanaŭčym kodeksie ab administracyjnych pravaparušeńniach praduhledžana norma, zhodna ź jakoj, kali asoba nie pryznaje siabie vinavataj u ździajśnieńni administracyjnaha pravaparušeńnia, sprava ŭ dačynieńni da jaho abaviazkova padlahaje napramku ŭ sud.
Pryniaty ŭ pieršym čytańni prajekt zakona taksama praduhledžvaje nadzialeńnie staršyniaŭ sudoŭ pravam prymać miery administracyjnaha ŭździejańnia (až da administracyjnaha aryštu) da daŭžnikoŭ, jakija ŭchilajucca ad vypłaty spahnanych ź ich sum.
Pavodle infarmacyi Sukała, ciapier u Biełarusi kala 920 tysiačaŭ asobaŭ abaviazany vypłačvać spahnanyja z ich sumy.
