Fota felix.by.
Śledčy kamitet rasśleduje kryminalnuju spravu ŭ dačynieńni da słužbovych asob zamiežnaha pradpryjemstva «Klinika «Novy zrok». Ab hetym BIEŁTA paviedamili ŭ adździele infarmacyi i suviazi z hramadskaściu SK.
Kryminalnaja sprava raspačataja Hienprakuraturaj pa materyjałach upraŭleńnia pa raskryćci ciažkich ekanamičnych złačynstvaŭ HUUS Minharvykankama.
«Vyśvietlena, što dyrektar, hałoŭny buchhałtar i inšyja słužbovyja asoby dadzienaha pradpryjemstva na praciahu niekalkich apošnich hadoŭ pry ŭvozie na terytoryju Biełarusi miedycynskich tavaraŭ i tavaraŭ miedycynskaha pryznačeńnia dla kamiercyjnych metaŭ uchililisia ad vypłaty mytnych płaciažoŭ u bujnym pamiery.
Dziejańni padazravanych kvalifikavanyja jak uchileńnie ad vypłaty mytnych płaciažoŭ u bujnym pamiery, učynieny hrupaj asob pa papiaredniaj zmovie», — raspaviali ŭ SK.
U ciapierašni čas śledstva vyśviatlaje ŭsie akaličnaści supraćpraŭnaj dziejnaści słužbovych asob. Adbirajecca miedycynskaje abstalavańnie, jakoje maje dačynieńnie da spravy, z metaj ŭstanaŭleńnia jaho pachodžańnia i adpaviednaści patrabavańniam zakanadaŭstva Biełarusi.
