U Minsku karupcyjaj u toj ci inšaj stupieni zakranuty praktyčna ŭsie haliny i śfiery dziejnaści.
Pra heta, jak paviedamiŭ staršy pamočnik prakurora horada Siarhiej Bałašaŭ, było zajaŭlena na haradskoj kaardynacyjnaj naradzie pa baraćbie sa złačynnaściu i karupcyjaj, jakaja prajšła 27 listapada.
Na naradzie abmiarkoŭvaŭsia stan baraćby z karupcyjaj i efiektyŭnaściu prymanych mier pa spynieńni karupcyjnych prajaŭleńniaŭ, a taksama stan prakurorskaha nahladu pa hetym pytańni. Jašče adnoj temaj było rasśledavańnie i sudovy razhlad kryminalnych spraŭ ab karupcyjnych złačynstvach.
Pavodle słoŭ Bałašava, za dzieviać miesiacaŭ 2013 hoda najbolšaja kolkaść karupcyjnych złačynstvaŭ zarehistravana ŭ pramysłovaści — 97, adukacyi — 59, dziaržaŭnym kiraŭnictvie — 35, handli — 30, achovie zdaroŭja — 22, budaŭnictvie — 17.
U Minsku, jak zaznačałasia na naradzie, za apošnija piać hadoŭ nazirajecca rost vyjaŭlenych karupcyjnych złačynstvaŭ. Pryčym sioleta hety pakazčyk samy vysoki za piać hadoŭ. Tak, za dzieviać miesiacaŭ 2013 hoda ŭ horadzie zarehistravana 354 karupcyjnyja złačynstvy. Na fonie ahulnaha źnižeńnia kolkaści ŭsich zarehistravanych złačynstvaŭ na 3,5% dola karupcyjnych uzrasła z 1,34% u 2012 hodzie da 2,05% sioleta.
Nazirajecca niaznačnaje źnižeńnie kolkaści vyjaŭlenych faktaŭ pieravyšeńnia ŭłady. Nie vyjaŭlalisia pasrednictva ŭ chabarnictvie, biaździejańnie słužbovaj asoby (adno ŭ 2012 hodzie), lehalizacyja materyjalnych kaštoŭnaściaŭ (adna ŭ 2012 hodzie) i niezakonny ŭdzieł u pradprymalnickaj dziejnaści. Na ŭzroŭni 2012 hoda zarehistravana vypadkaŭ złoŭžyvańniaŭ uładaj abo słužbovymi paŭnamoctvami (16).
Pa astatnich składach złačynstvaŭ adznačajecca rost kolkaści raspačatych kryminalnych spraŭ.
Na naradzie zaznačałasia, što pryniatyja pravaachoŭnymi orhanami miery pryviali da značnych źmienaŭ u struktury karupcyjnaj złačynnaści, vyjaŭlena bolš złačynstvaŭ, jakija ŭjaŭlajuć značnuju niebiaśpieku dla hramadstva i dziaržavy.
Pa faktach chabarnictva raspačata 256 kryminalnych spraŭ.
Pry hetym atrymańnie chabaru składaje kala pałovy ad usich vyjaŭlenych złačynstvaŭ, što tyčacca chabarnictva.
U pravaachoŭnych orhanach pryznajuć, što ličby ŭkazvajuć tolki na kolkaść zarehistravanych u rajonach horada karupcyjnych złačynstvaŭ i nie adlustroŭvajuć sapraŭdnaha stanovišča, jakoje składvajecca ŭ rehijonach, i pracu pravaachoŭnikaŭ, efiektyŭnaść jakoj va ŭsich biez vyklučeńnia rajonach niedastatkova vysokaja.
Asabliva na naradzie zaznačałasia, što kryminalnyja spravy ŭ dačynieńni da karumpavanych słužbovych asob, jakija zajmajuć adkaznaje stanovišča, udzielnikaŭ arhanizavanych hrup, za lehalizacyju dachodaŭ, zdabytych złačynnym šlacham, nosiać u Minsku adzinkavy charaktar.
