U Maskvie znajšli kvateru, u jakoj było zarehistravana dźvie tysiačy nielehałaŭ.
Pa dadzienych Hienieralnaj prakuratury Rasiei, niezakonnuju prapisku za hrašovaje ŭznaharodžańnie ažyćciaŭlaŭ supracoŭnik palicyi. Parušalniku pahražaje kryminalnaja sprava.
«Butyrskaja mižrajonnaja prakuratura Maskvy ŭ chodzie pravierki doma pa Ałtufjeŭskaj šašy vyjaviła kvateru, u jakoj razam z zarehistravanymi hramadzianami Rasiei z 2009 pa kastryčnik 2013 hadoŭ na mihracyjny ŭlik pastaŭlena bolš za dźvie tysiačy zamiežnych hramadzian i asob biez hramadzianstva», - paviedamili ŭ hałoŭnym nahladnym viedamstvie.
Supracoŭniki prakuratury adznačyli, što hetyja ludzi pa pakazanym adrasie nie pražyvajuć. Pa papiarednich dadzienych, niezakonnuju rehistracyju za hrašovuju ŭznaharodu ad 300 da 500 rubloŭ ažyćciaŭlaŭ supracoŭnik adździeła MUS Rasiei pa rajonie Lianozava, jaki zarehistravany ŭ hetaj kvatery, pieradaje RIA Novosti.
«U ciapierašni čas materyjały prakurorskaj pravierki nakiravanyja ŭ Butyrski mižrajonny śledčy adździeł Śledčaha kamiteta dla vyrašeńnia pytańnia ab uzbudžeńni kryminalnaj spravy pa častcy artykuła «Arhanizacyja niezakonnaj mihracyi», - zajavili ŭ prakuratury.
Adznačym, što raniej kiraŭnik MUS Rasiei Uładzimir Kałakolcaŭ padčas «uradavaj hadziny» ŭ Dziarždumie zajaviŭ, što palicyja vyjaviła ŭ maskoŭskim rajonie Birulova Zachodniaje dźvie tysiačy kvater ź nielehalnymi mihrantami. Ministr taksama adznačyŭ, što kolkaść złačynstvaŭ, učynienych zamiežnikami, uzrasła na 30% u kožnym rehijonie.
«Nienarmalnaja situacyja, kali častka žycharoŭ rajona vychodzić na «narodny schod», pratestujučy, u tym liku, suprać vialikaj kolkaści mihrantaŭ, a druhaja ŭ toj ža čas nielehalna zdaje svaje kvatery, pieratvarajučy ich u mini-internaty», - paviedamiŭ kiraŭnik MUS Rasiei Uładzimir Kałakolcaŭ.
