Smak Biełaruščyny. / Hienadź Kisialoŭ. — Minsk: Limaryus, 2013. — 498 s.
Jak mocna možna lubić Biełaruś? Vosiem hadzin u dzień, dvanaccać… Dva dni na tydzień, piać, siem. Adzinacć miesiacaŭ na hod, dvaccać. Heta nie da miesca paraŭnańnie, kaniečnie. Biełaruś možna lubić albo nie lubić. Ale voś kolki možna dla jaje vydatkoŭvać svajho žyćcia — sprava, jakaja maje kakretnyja miežy: časovyja, materyjalnyja…
Sioleta vydali čarhovuju knihu daśledčyka Hienadzia Kisialova. Jaho piać hadoŭ niama z nami, a spadčyna jaho pieravydajecca, publikujucca novyja knihi.
«Smak biełaruščyny» — heta dźvie knihi pad adnoj vokładkaj: «Radavodnaje dreva: Kalinoŭski — epocha — nastupniki» (pieršaje vydańnie było ŭ 1994) i «Smak biełaruščyny», jakuju aŭtar skłaŭ ź dziasiatak hadoŭ tamu, ale vydańnie źjaviłasia tolki ciapier. I chacia pamiž vychadam knih dvaccać hadoŭ, nie adčuvajecca razryvu: druhaja pisałasia ŭ praciah pieršaj.
Pra što kniha? Najpierš pra Kalinoŭskaha i jahonych paŭstancaŭ.
Chto stajaŭ plačom da plača suprać rasijskich karnikaŭ, a chto pisaŭ danosy na svaich paplečnikaŭ? Jak «raskołvali» aryštavanych insurhientaŭ? Čamu adnych viešali, inšych adpraŭlali na katarhu?
Aŭtar piša pra tuju epochu, XIX stahodździe, pra asobaŭ, jakija ŭpłyvali na čas i padziei — tych, chto siońnia staŭ nacyjanalnym simvałam u Biełarusi (Dunin-Marcinkievič, Bahuševič, Kupała) a inšych viedaje i nie kožny daśledčyk (Čudoŭski, Hałubovič, Sen-Kler).
«Smak Biełaruščyny» — materyjalnaje ŭvasableńnie addanaści Hienadzia Kisialova Biełarusi. Kali vypiski z archiŭnych dakumientaŭ, kopii samich dakumientaŭ, źviestki ź listoŭ źbirajucca dziesiacihodździami pierad tym, jak trapić na staronki haziet, časopisaŭ, knih. Nie čakaŭ vyniku adrazu, a zaciata pracavaŭ. Heta čałaviek-encykłapiedyja.
…Dyk kolki žyćcia možna vydatkavać dla Biełarusi? — Usio da kropli, jak pakazvaje prykład Kisialova: daślečyka niama z nami, a jahonaja praca na nivie Biełaruščyny daje plon i siońnia.
Kniha «Smak Biełaruščyny» vyjšła dziakujučy ruchu «Za Svabodu», hramadskaj kulturna-histaryčnaj kampanii «1863», hramadskaj kampanii «Havary praŭdu», mižnarodnamu kansorcyumu «JeŭraBiełaruś».
Nabyć vydańnie možna ŭ Akademknizie (Minsk, pr-t Niezaležnaści, 72).
