Alaksandr Łukašenka 24—25 śniežnia ŭ Maskvie voźmie ŭdzieł u pasiadžeńniach Vyšejšaha jeŭrazijskaha ekanamičnaha savieta i Vyšejšaha dziaržaŭnaha savieta Sajuznaj dziaržavy.
Jak paviedamlaje pres-słužba kiraŭnika dziaržavy, płanujecca, što na samicie 24 śniežnia prezidenty krain JeŭrAzES abmiarkujuć pytańni dalejšaha raźvićcia intehracyjnaha ŭzajemadziejańnia i dałučeńnia da jaho novych krain. U centry ŭvahi budzie chod pracy nad prajektam dahavora ab Jeŭrazijskim ekanamičnym sajuzie.
U paradak dnia pasiadžeńnia taksama ŭklučany pytańni, jakija tyčacca kantrolu za vykanańniem pravił kankurencyi, dziejnaści subjektaŭ naturalnych manapolij. Płanujecca zaćvierdzić biudžet Jeŭrazijskaj ekanamičnaj kamisii na 2014 hod.
Na pasiadžeńni Vyšejšaha dziaržsavieta Sajuznaj dziaržavy 25 śniežnia miarkujecca razhledzieć asnoŭnyja pytańni biełaruska-rasijskaha supracoŭnictva ŭ roznych śfierach.
Paradak dnia mierapryjemstva ŭklučaje bolš za dziesiać punktaŭ. Jany tyčacca handlova-ekanamičnaha supracoŭnictva dźviuch krain, biudžetu Sajuznaj dziaržavy na 2014 hod, prahramy ŭzhodnienych dziejańniaŭ u halinie źniešniaj palityki, zabieśpiačeńnia roŭnych pravoŭ hramadzian u sacyjalnaj śfiery, uzajemadziejańnia ŭ halinie kultury, padrychtoŭki da śviatkavańnia ŭ 2014—2015 hadach 70-hodździa vyzvaleńnia Biełarusi ad niamiecka-fašysckich zachopnikaŭ i 70-hodździa Pieramohi ŭ Vialikaj Ajčynnaj vajnie.
