Stabilnaść abmiennaha kursu biełaruskaha rubla ŭ zapłanavanych paramietrach budzie zaležać ad pryciahnieńnia valuty ŭ krainu. Pra heta zajaviŭ namieśnik ministra finansaŭ Maksim Jermałovič u intervju «Narodnoj hazietie».
«Biudžet-2014 źviarstany zychodziačy z abmiennaha kursu 9.800 rubloŭ za dołar. Ci ŭtrymajemsia na hetym uzroŭni, zaležyć ad taho, nakolki paśpiachova budziem pracavać nad pryciahnieńniem valuty ŭ krainu, u tym liku na mety refinansavańnia pazykovych abaviazacielstvaŭ. Hałoŭnaja zadača dla ŭrada na bližejšy hod — zabiaśpiečyć raŭnavahu i ŭstojlivaść na finansavym rynku. Navat kali dla hetaha daviadziecca pastupicca rostam VUP ci finansavańniem asobnych dziaržprahram. Kali ŭrad nie źviernie z hetaha kursu, abmienny kurs budzie stabilnym», — zajaviŭ Jermałovič.
«U nas prablema ŭ tym, što abaviazacielstvy pa pahašeńni źniešnich daŭhoŭ raźmierkavanyja nieraŭnamierna pa hadach. Pačynajučy z hetaha hoda my ŭvajšli ŭ trochhadovy pieryjad pikavych vypłat. U nastupnym hodzie płaciažy pa pahašeńni i absłuhoŭvańni źniešniaha doŭhu ŭzrastuć i składuć 3,2 miljarda dołaraŭ. Adnak ni pra jakoje spaŭzańnie ŭ pazykovuju jamu havorka nie idzie. «Nieźviazanyja» i źniešnija kredyty pryciahvajucca vyklučna na mety refinansavańnia dziarždoŭhu, što źjaŭlajecca narmalnaj suśvietnaj praktykaj. U pierśpiektyvie ŭ nas atrymańnie šostaha tranšu kredytu Antykryzisnaha fondu JeŭrAzES, iduć taksama pieramovy z Rasijaj i Kitajem pra mahčymaje dvuchbakovaje supracoŭnictva ŭ finansavaj śfiery», — skazaŭ namieśnik ministra finansaŭ.
Što da zamiežnych kredytnych resursaŭ, to jany, pavodle słoŭ Jermałoviča, pryciahvajucca dla realizacyi pryjarytetnych inviestprajektaŭ, jakija zabiaśpiečvajuć prytok valutnaj vyručki ŭ krainu, što taksama dapamahaje ažyćciaŭlać płaciažy pa źniešnim doŭhu.
«Možna, viadoma, raźličycca pa daŭhach za košt nazapašanych astatkaŭ srodkaŭ biudžetu. Ale heta značyć vyklučyć značnuju sumu valuty z ekanomiki, skaracić biudžetnyja raschody, padtrymku vioski, spynić dalejšuju madernizacyju pradpryjemstvaŭ. Tamu lepš reziervy zachavać, a resursy pryciahnuć za košt źniešnich zapazyčańniaŭ i pryvatyzacyi abjektaŭ dziaržułasnaści», — adznačyŭ namieśnik ministra.
Pavodle jaho słoŭ, da kanca nastupnaha hoda Minfin čakaje źniešni dziarždoŭh Biełarusi na ŭzroŭni 14,6 miljarda dołaraŭ. Heta mienš jak 20% VUP, što nižej za parohavyja značeńni hetaha pakazčyku ŭ paramietrach ekanamičnaj biaśpieki krainy.
«Kali aceńvać stan našaha źniešniaha dziarždoŭhu na fonie inšych krain, to my vyhladajem značna lepš. Siońnia na adnaho čałavieka ŭ nas prypadaje prykładna 1.300 dołaraŭ źniešniaha dziarždoŭhu, u toj čas jak, naprykład, u Polščy hety pakazčyk składaje bolš za čatyry tysiačy dołaraŭ, u Łatvii — kala 4.500 dołaraŭ, u Litvie — bolš za piać tysiač dołaraŭ. I ja nie skazaŭ by, što ekanomika nazvanych krain hienieryruje takija dachody, jakija dazvalajuć biazbolna raźličycca z hetymi daŭhami. Kali ŭ Biełarusi amal 80% pradpryjemstvaŭ naležyć dziaržavie i pryvatyzacyja moža słužyć adnoj z krynic vypłat pa pazykovych abaviazacielstvach, to tam niama čaho pryvatyzavać, i rana ci pozna kožny hramadzianin hetych krain budzie vymušany płacić za daŭhi z ułasnaj kišeni», — zajaviŭ Maksim Jermałovič.
