Administratar hrupy, pryśviečanaj akcyi «Stop-padatak», u sacyjalnaj sietcy «UKantakcie», nacyjanał-balšavik Dźmitryj Palijenka pryhavorany sudom Zavodskaha rajona Minska da 15 sutak aryštu, paviedamlaje pravaaabarončy sajt spring96.org.
Palijenka byŭ zatrymany kala 16 hadzin 26 śniežnia na prachadnoj Minskaha aŭtamabilnaha zavoda, dzie jon pracuje. Va UUS Zavodskaha rajona ŭ dačynieńni da aktyvista byŭ składzieny pratakoł pa art. 17.1 KoAP (drobnaje chulihanstva).
Sud adbyŭsia ŭ piatnicu. Rašeńnie vyniesła sudździa Nastaśsia Vosipčyk. Jana adchiliła chadajnictva ab zapatrabavańni i prahladzie videa z prachadnoj zavoda, jakoje mahło zaśviedčyć, što Palijenka nie ŭčyniaŭ nijakich supraćpraŭnych dziejańniaŭ.
Jak paviedamlajuć pravaabaroncy, aktyvist maje namier abskardzić svajo zatrymańnie i pryhavor ab aryšcie. Jon rasceńvaje dziejańni pravaachoŭnikaŭ jak previentyŭny pieraśled, źviazany z pratestami aŭtamabilistaŭ suprać novaha padatku.
Viečaram 26 śniežnia na sajcie HUUS Minharvykankama było raźmieščana adrasavanaje aŭtaŭładalnikam papiaredžańnie ab adkaznaści za ŭdzieł u čarhovaj akcyi «Stop-padatak».
«Supracoŭniki staličnaj Dziaržaŭtainśpiekcyi ŭzmocniać kantrol za vykanańniem vadzicielami praviłaŭ prypynku i stajanki transpartnych srodkaŭ. U suviazi z zaklikami, što źjavilisia ŭ internecie, mahčymyja niezakonnyja dziejańni vadzicielaŭ pa błakiravańni ruchu transpartu buduć spyniacca, vinoŭniki buduć pryciahnuty da adkaznaści, u tym liku z vykarystańniem mier prymusovaj evakuacyi aŭtamabilaŭ», — padkreślivaje DAI.
Paviedamlajecca taksama, što materyjały ŭ dačynieńni da vadzicielaŭ, jakija dapuścili parušeńni PDR na praśpiekcie Niezaležnaści ŭ Minsku viečaram 20 śniežnia, «zaraz abahulniajucca, paśla čaho buduć pieradadzieny ŭ prakuraturu dla dačy pravavoj acenki».
U toj dzień z 18 da 19 hadzin sotni vadzicielaŭ hukavymi i śvietłavymi sihnałami, a taksama pavolnym rucham vykazali pratest suprać uviadzieńnia novaha padatku za vydaču dazvołu na dopusk transpartnaha srodku da ŭdziełu ŭ darožnym ruchu. Niekatoryja spynialisia i ŭklučali avaryjnuju sihnalizacyju.
Padčas akcyi byli zatrymany piać čałaviek. Hramadski aktyvist Alaksandr Franckievič pryhavorany da 12 sutak aryštu, Žycharki Minska Nastaśsia Kuchta i Nastaśsia Šaternik, jakija zastupilisia za jaho padčas zatrymańnia, aštrafavanyja na piać i dziesiać bazavych vieličyniaŭ adpaviedna (650 tys. i 1,3 młn. rubloŭ). Kanstancin Hłuško asudžany na piać sutak aryštu, sprava ŭ dačynieńni da piataha zatrymanaha — pasažyra Hłuško Andreja Samochina — spyniena.
