100 podpisaŭ za admienu aŭtamabilnaj pošliny i adstaŭku ŭrada sabrali na praciahu hadziny ŭ centry Minska lidar Abjadnanaj hramadzianskaj partyi Anatol Labiedźka i sustaršynia kampanii «Za spraviadlivyja vybary» Viktar Karniajenka.
Palityki pravodzili zbor podpisaŭ 5 studzienia ad 12 da 13 hadzin na płoščy Jakuba Kołasa i ŭ rajonie Kamaroŭskaha rynku. Za hetym pracesam nazirała biesprecedentnaja kolkaść supracoŭnikaŭ milicyi i śpiecsłužbaŭ, jakija, adnak, nie pieraškadžali. Nie mienš za dziesiać čałaviek u cyvilnym uvieś čas supravadžali Labiedźku i Karniajenku, častka ź ich bieśpierapynna viali videazdymku, a na prylehłych vulicach dziažuryli mašyny DAI i znachodziłasia niekalki milicejskich aŭtobusaŭ.
«Ułady praviali sapraŭdnuju śpiecapieracyju pa nazirańni za zboram podpisaŭ. Napeŭna, bieź milicyi i kamier ludzi b bolš aktyŭna stavili svaje podpisy. Ale navat u takich umovach utvaralisia nievialikija čerhi žadajučych padpisacca, pryčym padpisvalisia nie tolki minčanie, ale i žychary inšych haradoŭ Biełarusi. Heta kaža ab tym, što prablema tyčycca nie tolki stalicy, ale i ŭsioj Biełarusi», — skazaŭ Labiedźka.
Jon taksama paviedamiŭ, što zbor podpisaŭ za admienu pošliny pravodzicca ŭžo ŭ treci raz. Tamu za ŭsio ŭžo sabrana niekalki tysiač podpisaŭ.
Jak paviedamiŭ Karniajenka, pakul nie stavicca meta sabrać, da prykładu, miljon podpisaŭ. «Heta, chutčej, demanstracyjnaja, simvaličnaja akcyja z metaj pakazać, što ludzi nie bajacca adkryta vykazvać niazhodu ź dziejańniami ŭładaŭ», — skazaŭ jon.
Rašeńnie ŭvieści z 2014 hoda pošlinu za dopusk aŭtamabilaŭ da ŭdziełu ŭ darožnym ruchu było pryniata ŭ śniežni. Pamier pošliny składaje ad 3 da 25 bazavych vieličyń (ciapier ad 390 tys. da 3 młn. 250 tys. rubloŭ), u tym liku dla fizičnych asob na lehkavyja aŭtamabili — ad 3 da 10 bazavych vieličyń (ad 390 tys. da 1,3 młn.). Praduhledžana samastojnaja vypłata pošliny da momantu prachodžańnia techahladu.
