Kulminacyjnaja scena hetaha filma - apakaliptyčny bitva nacystaŭ i partyzan na hihanckim tarfianym bałocie - tak i nie była źniataja. Aŭtary scenaryja pryjšli da vysnovy, što hledačy jaje mohuć nie vytrymać. I ŭsio adno
z premjernych pakazaŭ hetaj stužki «Biełaruśfilma» «chutkija», što dziažuryli kala kinateatraŭ, vieźli ludziej z sardečnymi prystupami.
Rabota režysiora Elema Klimava «Idzi i hladzi», što vyjšła na ekrany ŭ 1985 hodzie i suaŭtaram jakoj źjaŭlajecca piśmieńnik Aleś Adamovič, u rejtynhu najbujniejšaj suśvietnaj kiniematahrafičnaj bazy dadzienych IMDb źjaŭlajecca najlepšym biełaruskim filmam.
Ideja pryviazać da jeŭrapiejskaj mapy kinastužki toj ci inšaj krainy, jakija atrymali najlepšyja acenki IMDb, pryjšła internet -karystalniku VictorVan.
Na hetaj mapie
biełaruski film susiedničaje z žyćciaradasnymi rasijskimi «Džentlmienami ŭdačy».
Ad lidara rasijskaha kiniematohrafa adnu z samych praniźlivych historyj pra vajnu adździalajuć litaralna dziasiatyja doli pracenta ŭ rejtynhu (8,2 z 10 suprać 8,4).
Brytanski časopis Timeout London i zusim addaŭ biełaruskamu filmu pieršaje miesca ŭ rejtynhu «50 najvialikšych filmaŭ pra Druhuju suśvietnuju vajnu».
«Uźniosły tvor, jaki vykarystoŭvaje kožny instrumient, dastupny ŭ kiniematahrafičnym arsienale, kab dasiahnuć maksimalna vyraznaha, časam da młosnaści, efiektu, - prakamientavali svajo rašeńnie ekśpierty vydańnia. -
Hety film časta paraŭnoŭvajuć z «Apakalipsisam siońnia» Kopały ŭ tym, jak jon pakazvaje narastańnie varjactva samotnaha čałavieka, jaki ŭsio hłybiej i hłybiej apuskacca ŭ žachi vajny».
Film staŭ kłasikaj, i paŭpłyvaŭ na raźvićcio vajennaha kiniematohrafa. Hety ŭpłyŭ možna zaŭvažyć u kultavym filmie Styviena Śpiłbierha «Vyratavać radavoha Rajana». U jakim mienavita epizodzie - znajdzicie sami. Heta dobraja nahoda pierahledzieć abiedźvie stužki.