U Biełarusi rychtujecca zakonaprajekt, jaki praduhledžvaje admienu manapolii «Biełtelekama» na akazańnie niekatorych vidaŭ pasłuh suviazi. Ab hetym paviedamiŭ namieśnik dyrektara Nacyjanalnaha centra zakonaprajektnaj dziejnaści pry prezidencie Biełarusi Valeryj Daraškievič.
Pavodle jaho słoŭ, płan padrychtoŭki zakonaprajektaŭ praduhledžvaje raspracoŭku prajekta zakona ab uniasieńni źmianieńniaŭ i dapaŭnieńniaŭ u zakon ab elektrasuviazi, pryniaty ŭ 2005 hodzie. Heta źviazana ź nieabchodnaściu pryviadzieńnia zakanadaŭstva ŭ adpaviednaść z patrabavańniami Suśvietnaj handlovaj arhanizacyi.
Valeryj Daraškievič adznačyŭ, što płanujecca źniać manapoliju nacyjanalnaha apieratara elektrasuviazi ŭ vypadkach, kali jana strymlivaje raźvićcio rynku pasłuh suviazi. «Adnak skazać, što manapolija budzie ŭstaraniona poŭnaściu, nielha», — padkreśliŭ namieśnik dyrektara Nacyjanalnaha centra zakonaprajektnaj dziejnaści.
Kali ŭ biahučym hodzie zakon budzie padrychtavany i ŭniesieny ŭ Pałatu pradstaŭnikoŭ, to da kanca nastupnaha hoda źmianieńni mohuć być uniesieny. «Ciapier ciažka vyznačyć, u jakim vyhladzie budzie prajekt, pakolki jon pastajanna raźvivajecca i dapracoŭvajecca», — zaŭvažyŭ namieśnik dyrektara.
«Ciapier samymi klučavymi momantami, pa jakich buduć vieścisia raboty ŭ hetym napramku, źjaŭlajucca admiena manapolii na ažyćciaŭleńnie mižnarodnych zvankoŭ i ŭzajemadziejańnie pamiž apieratarami sotavaj suviazi», — prainfarmavaŭ Valeryj Daraškievič. Dziejučy zakon «Ab elektrasuviazi» dazvalaje apierataram złučacca pamiž saboj tolki praz «Biełtelekam». «Jak by nacyjanalnaha apieratara ni zadavalniała isnujučaje stanovišča, jon vymušany ličycca z sučasnymi ŭmovami. My pastupova prychodzim ad kiravańnia da rehulavańnia, — rastłumačyŭ jon. — Ciapier my pracujem nad stvareńniem pravił, jakija pavinny zadavolić najbolšuju kolkaść ihrakoŭ telekamunikacyjnaha rynku».
Zakonaprajekt taksama budzie vyznačać asnoŭnyja napramki raźvićcia elektrasuviazi na asnovie ajčynnaha i zamiežnaha vopytu, refarmavańnia sistemy elektrasuviazi z ulikam ustupleńnia Biełarusi ŭ SHA. Praduhledžvajecca, što źmianieńni buduć nakiravany na ŭrehulavańnie arhanizacyjna‑techničnaha ŭzajemadziejańnia apierataraŭ elektrasuviazi, źmianieńnie paradku raźlikaŭ taryfaŭ na pasłuhi dałučeńnia na asnovie prazrystaści, vyznačeńnie paradku vyrašeńnia sprečak pamiž apieratarami, zabieśpiačeńnie intaresaŭ fizičnych asob i, narešcie, zbałansavanaje raźvićcio rynku pasłuh va ŭmovach kankurencyi šlacham uviadzieńnia univiersalnaha absłuhoŭvańnia i akazańnia univiersalnych pasłuh.
Akramia hetaha, praduhledžvajecca ŭviadzieńnie dobraachvotnaj siertyfikacyi pasłuh suviazi, što akazvajucca apieratarami. Vyklučeńnie składuć apieratary, jakija zajmajuć daminujučaje stanovišča na rynku, a taksama jakija akazvajuć univiersalnyja pasłuhi, — dla ich nieabchodna ŭvieści abaviazkovuju siertyfikacyju.
Jak adznačyŭ staršynia asacyjacyi infarmacyjnych i kamunikacyjnych pradpryjemstvaŭ «Bielinfakam» Andrej Narejka, kali źniknie manapolija na pasłuhi suviazi, na rynak pryjduć apieratary, jakija pradastaviać vysokatechnałahičnyja i sučasnyja servisy.
«Na rynak vyjduć mižnarodnyja apieratary, buduć źnižany taryfy na mižnarodnyja zvanki i dostup u Internet, a taksama pavialičycca skoraść dostupu ŭ sietku. Heta adbudziecca nie zaŭtra, ale fakt raspracoŭki takoha dakumienta śviedčyć ab značnym prahresie ŭ hetaj śfiery», — skazaŭ jon.
Na dumku staršyni asacyjacyi, zakon 2005 hoda atrymaŭsia nie vielmi prahresiŭnym. Ciapier adbyvajucca źmianieńni, źviazanyja i z ustupleńniem Biełarusi ŭ SHA, i z raźvićciom sučasnych technałohij. «Ministerstva suviazi i infarmatyzacyi niepakoić, jak dziejničać u pieryjad, kali treba mianiać pryvyčnyja ŭmovy. Nieabchodna raspracavać narmatyŭnuju bazu pa rabocie ŭ hety pieryjad», — adznačyŭ jon.
«Bielinfakam» prapanavaŭ pravieści ŭ listapadzie sumiesna ź Ministerstvam suviazi i infarmatyzacyi kanfierencyju pa pytańniach restrukturyzacyi rynku pasłuh suviazi. «My płanujem abmierkavać situacyju, što skłałasia ŭ Rasii, Ukrainie i Litvie, kali jany admovilisia ad manapolii nacyjanalnych apierataraŭ elektrasuviazi. Chočam vyznačyć, jakija narmatyŭnyja akty treba raspracavać, jak apierataram vychodzić na konkurs, što abmiežavać, a što nie, i ŭ jakoj paśladoŭnaści ŭsio heta vykonvać», — kanstatavaŭ Andrej Narejka.
