Alaksandr Łukašenka 14 studzienia padpisaŭ dekret № 1 «Ab niekatorych pytańniach dziaržaŭnaha rehulavańnia abarotu nasieńnia maku», u adpaviednaści ź jakim dziaržava atrymlivaje vyklučnaje prava na ažyćciaŭleńnie aptovaha handlu nasieńniem maku.
Realizacyja hetaha prava budzie ažyćciaŭlacca jurydyčnymi asobami, vyznačanymi Savietam ministraŭ, paviedamlaje pres-słužba kiraŭnika dziaržavy.
Dekret padrychtavany Ministerstvam unutranych spraŭ va ŭzajemadziejańni z Administracyjaj prezidenta i dziaržaŭnym sakrataryjatam Savieta biaśpieki i praduhledžvaje kompleks mier, skiravanych na spynieńnie niekantralavanaha ŭvozu ŭ Biełaruś nasieńnia maku i jaho raspaŭsiudžvańnia.
U pryvatnaści dakumientam zabaraniajecca roźničny handal nasieńniem maku ŭ mahazinach płoščaj mienš jak 50 kv. m (za vyklučeńniem handlovych abjektaŭ arhanizacyj spažyvieckaj kaapieracyi, mahazinaŭ inšych arhanizacyj, raźmieščanych u sielskaj miascovaści), na rynkach, u handlovych aŭtamatach, šlacham ažyćciaŭleńnia raznosnaha handlu i handlu pa ŭzorach. Pry hetym nasieńnie maku dla prodažu pavinna być rasfasavanaje ŭ śpiecyjalnuju ŭpakoŭku masaj nie bolš jak 200 hramaŭ.
Zabaraniajecca taksama zachoŭvańnie i pieramiaščeńnie jurydyčnymi asobami, indyvidualnymi pradprymalnikami i hramadzianami nasieńnia maku z parušeńniem umoŭ, vyznačanych dekretam. Za parušeńni ŭstanoŭlenaha paradku abarotu nasieńnia maku pry jaho pieramiaščeńni, zachoŭvańni i realizacyi ŭstanoŭlena administracyjnaja adkaznaść z užyvańniem štrafaŭ i kanfiskacyi.
Tak, za zachoŭvańnie i pieramiaščeńnie pa terytoryi Biełarusi fizičnaj asobaj bolš jak 2 kh nasieńnia maku, nie rasfasavanaha ŭ śpiecyjalnuju ŭpakoŭku, praduhledžany štraf da 70 bazavych vieličyń z kanfiskacyjaj nasieńnia, jakoje pieravyšaje dapuščalnyja abjomy, a taksama transpartnych srodkaŭ, vykarystanych dla ich pieramiaščeńnia.
Pieramiaščeńnie pa terytoryi krainy indyvidualnym pradprymalnikam ci jurydyčnaj asobaj nasieńnia maku biez zaklučeńnia dahavora kupli-prodažu ci pastaŭki z upaŭnavažanaj arhanizacyjaj praduhledžvaje adkaznaść u vyhladzie štrafu da 250 (dla indyvidualnaha pradprymalnika) ci 300 (dla jurydyčnaj asoby) bazavych vieličyń z kanfiskacyjaj nasieńnia maku i transpartnych srodkaŭ, vykarystanych dla ich pieramiaščeńnia.
Składać pratakoły pra adpaviednyja pravaparušeńni buduć słužbovyja asoby orhanaŭ unutranych spraŭ, Kamiteta dziaržaŭnaha kantrolu, padatkovych orhanaŭ i miascovych vykanaŭčych i rasparadčych orhanaŭ. Razhlad spraŭ ab hetych administracyjnych pravaparušeńniach adniesieny da kampietencyi sudoŭ.
Takija miery ŭvodziacca ŭ dziejańnie 1 lutaha 2014 hoda. Da hetaha času ŭradu daručana vyznačyć pieralik arhanizacyj, upaŭnavažanych na ažyćciaŭleńnie aptovaha handlu nasieńniem maku, a taksama paradak ažyćciaŭleńnia takoha handlu.
