06:57
Siłaviki raspranuli, ablili chałodnaj vadoj i abstralali humavovymi kulami dvuch chłopcaŭ. Humovyja kuli prymianialisia i raniej unačy.
06:56
Supraćstajańnie praciahvałasia ŭsiu noč. Milicyja praciahvała palivać z brandsbojtaŭ, stała viadoma, što ŭ Kijeŭ idzie daniecki «Bierkut».
Eks-ministr unutranych spraŭ Juryj Łucenka zaklikaŭ usich ukraincaŭ vychodzić na Majdan
Na stadyjonie «Dynama» ŭžo harać kasy, uzryvajucca hranaty, laciać kamni.
00:41
«Piražki haračyja, haračyja piražki», — heta niejkaja žančyna niasie kamieńnie da «linii frontu» na Hrušeŭskaha.
Harnist zajhraŭ Himn Ukrainy.
Tym časam usia śpiectechnika i mašyny Bierkutu na Hrušeŭskaha zhareła. U tym liku kaktejlem Mołatava spalili i vadamiot.
Tut sabrałasia niekalki tysiač. Ludzi ŭzbrojvajucca kamieńniem, u mnohich ščyty. Boj užo tryvaje vosiem hadzin i nie ścichaje.
00:05
Tym časam na Hrušeŭskaha ludzi ŭzbrojvajucca tratuarnaj plitkaj, pieradajučy jaje da «linii frontu».
U studyi Hromadśkie TV pryjšoŭ Vital Kličko. «Davajcie chvilin 20 [na intervju], i ja pajdu», — kaža jon.
Jon raskazvaje pra pravakataraŭ i raskazvaje pra sustreču tet-a-tet ź Janukovičam u Mižhorji.
«Ja skazaŭ, što zaraz Ukraina na miažy hramadzianskaj vajny, i jaje (situacyju) treba vyrašać. Najpierš — treba pravieści daterminovyja prezidenckija vybary. Janukovič vielmi sturbovany, — kaža Kličko, — ale pilna sočyć za padziejami».
«Ja nie bajusia ŭziać na siabie adkaznaść», — skazaŭ jon. Žurnalisty zakidajuć jamu, što lidary apazicyi biaździejnaściu paspryjali krovapralićciu.
Kličko chvalujecca, pačynaje pa-ŭkrainsku, źbivajecca na rasijskuju, viartajecca na ŭkrainskuju. «Ja nie chaču, kab byli śmierci».
Žurnalisty paŭtarajuć: «Što vy najpierš skazali Janukoviču»? — Ja skazaŭ, što «pieradusim adstaŭka ŭrada i Janukoviča» — «A jon?» — «Zrabiŭ vyhlad, što prapuściŭ miž vušej i pačaŭ pra stvareńnie kamisii», — kaža Kličko.
«Ja nie vyklučaju mahčymaści hramadzianskaj vajny, taki scenar dapuścić nielha. Kroŭ nikomu nie patrebnaja», — skazaŭ Kličko.
23:50
Kličko: Janukovič paabiacaŭ kruhły stoł
Prezident Ukrainy Viktar Janukovič paabiacaŭ u paniadziełak ranicaj stvaryć kamisiju z pradstaŭnikoŭ Administracyi prezidenta, urada i pradstaŭnikoŭ apazicyi, jakaja zojmiecca vyrašeńniem kryzisnaj situacyi ŭ krainie.
Pra heta paviedamiŭ lidar partyi «UDAR» Vital Kličko paśla sustrečy ź Janukovičam u Mižhorji.
«My z deputatami pryjechali ŭ Miežyhorje i paŭhadziny čakali la miažy ŭnutranych vojskaŭ, jakija nas nie prapuskali. Zatym puścili tolki mianie. Ja vykazaŭ patrabavańni ludziej, jakija dva miesiacy pratestujuć na Majdanie. I što treba nieadkładna vyrašyć palityčny kryzis», — padkreśliŭ Kličko.
23:40
Na Majdanie Niezaležnaści ŭzmacniajuć achovu barykad ŭ čakańni šturmu.
Pra heta zajaviŭ kamiendant Majdanu Andrej Parubij.
Akramia taho, da napadu rychtujecca Dom prafsajuzaŭ. Tam padrychtavali pažarnyja šłanhi, kab u vypadku ataki palivać napadnikaŭ vadoj.
23:36
U Kijevie pa vulicy Bahatyrskaj jeduć 25 aŭtobusaŭ z «Bierkutam». Jany raźbili mašyny mitynhoŭcaŭ i zatrymali adnaho z aktyvistaŭ.
Pra heta paviedamlaje Vital Portnikaŭ u svaim tvitary sa spasyłkaj na aktyvistaŭ «Aŭtamajdanu».
Paviedamlajecca, što kałony aŭtobusaŭ prabiłasia praz stroj aŭtamabilaŭ mitynhoŭcaŭ, pry hetym raźbili mašyny i zatrymali adnaho z aktyvistaŭ.
23:35
Janukovič prapanavaŭ kruhły stoł z apazicyjaj.
Lidar frakcyi Baćkaŭščyna ŭ Viarchoŭnaj Radzie Arsień Jacaniuk abviaściŭ sa sceny Majdana, što tolki što jamu patelefanavaŭ prezident Ukrainy Viktar Janukovič i prapanavaŭ zaŭtra pravieści pieramovy ŭ farmacie «kruhłaha stała».
Pa słovach Jacaniuka, paśla Janukoviča jamu patelefanavaŭ sakratar Rady nacyjanalnaj biaśpieki Andrej Klujeŭ.
«Chutčej za ŭsio, mienavita Klujeŭ i budzie na miescy Lovačkina (byłoha kiraŭnika Administracyi — NN). Mienavita Klujeŭ adkazvaje za hetyja pieramovy», — napisaŭ na svajoj staroncy ŭ Facebook narodny deputat ad Baćkaŭščyny Alaksandr Bryhiniec.
23:26
Mitynhoŭcy padpalili niekalki milicejskich hruzavych aŭtamabilaŭ, što pierakryvajuć vulicu Hrušeŭskaha ŭ centry Kijeva, dzie voś užo bolš za 7 hadzin nie ścichaje supraćstajańnie z pravaachoŭnikami.
milicyja sprabuje patušyć ich z vohnietušycielaŭ, ale joj heta pakul nie ŭdajecca.
Milicyja ŭžyvaje śvietłašumavyja i hazavyja hranaty, a taksama ślozaciečny haz. Pratestoŭcy kidajuć u vartavych paradku kamianiami.
Na hety čas ranieńni atrymali 24 mitynhoŭcaŭ i bolš za 40 pravaachoŭnikaŭ.
22:45
Darečy, žurnalisty asprečvajuć mierkavańnie, što biesparadki ŭsčali členy «Pravaha siektara». Jany kažuć, što tam šmat znajomych, u tym liku z rehijonaŭ, jakich dastała biaspraŭje, tatalnaja karupcyja ŭ krainie. «Heta nie za Jeŭropu, prosta zadziaŭbło», taki słohan. Biahučaja situacyja mocna radykalizavała častku hramadstva, kažuć jany.
Janukovič buduje nie anałah Rasii, nie Biełaruś (tam narod achviaruje svabodaj, dziela niejkich dabrotaŭ, kažuć jany), Janukovič buduje Samali, takoje paraŭnańnie pryvodziać ukrainskija žurnalisty.
Tym časam supraćstajańnie na Hrušeŭskaha praciahvajecca. Mitynhoŭščyki znoŭ cisnuć na aŭtobusy. Bierkut baronicca.
22:27
U efiry Hromadśkie TV paviedamlajuć, što milicyja pačała stralać humovymi kulami. Žurnalisty praviarajuć infarmacyju.
Razam z tym častka pratestoŭcaŭ viartajecca z vulicy Hrušeŭskaha na Majdan, źjaviłasia infarmacyja pra jaho razhon.
21:53
Milicyju i Bierkut na Hrušeŭskaha šturmuje «Pravy siektar».
Takuju vysnovu možna zrabić z paviedamleńniaŭ supolnaści ŭ «Vkontaktie». Tak, na staroncy supolnaści aktyŭna kamientujucca i kaardynujucca padziei na Jeŭrapiejskaj płoščy i pad stadyjonam «Dynama».
Udzielnikaŭ zaachvočvajuć da dziejańniaŭ, zaklikajuć dałučycca aktyvistaŭ ź inšych haradoŭ, dapamahčy z pradastaŭleńniem «šklanych rečaŭ» — litrovych butelek (dla «kaktejlaŭ Mołatava»), nahadvajuć pra nieabchodnaść mieć pry sabie piratechniku i h.d.
21:47
Vital Kličko skiravaŭsia ź inšymi narodnymi deputatami ŭ zaharadnuju rezidencyju ŭ Mižduhirje, paviedamlaje Hromadśkie TV.
Klička adnaho prapuścili za kardon milicyi, što vartuje rezidencyju.
Ci vyjdzie adtul, iranizujuć žurnalisty. «Voś situacyja, Janukovič siadzić i čakaje Klička», — śmiajucca žurnalisty.
Kličko skiravaŭsia, kab pieradać patrabavańni demanstrantaŭ: daterminovyja vybary i spynieńnie procistajańnia.
21:39
Lidar «Baćkaŭščyny» Arsień Jacaniuk pryjšoŭ na Hrušeŭskuju i zaklikaje pratestoŭcaŭ paviarnuć na Majdanie, paviedamiła ŭ žyvym efiry Hromadśkie TV.
20:35
Mitynhoŭcy na vulicy Hrušeŭskaha ŭ centry Kijeva, dzie nie ścichajuć sutyčki z pravaachoŭnikami, kinuli niekalki razoŭ u bok milicejskaha kardona, što zastupaje vulicu, kaktejl Mołatava.
U adkaz milicyja zadziejničała śvietłašumavyja hranaty.
U pravaachoŭnikaŭ z natoŭpu pratestoŭcaŭ bieśpierapynna laciać kamiani.
20:14
Pravaachoŭniki ŭžyli vadamiot suprać ludziej, jakija ŭdzielničajuć u sutyknieńniach na vuł. Hrušeŭskaha kala stadyjona imia Valeryja Łabanoŭskaha.
Jak paviedamlaje «Interfaks-Ukraina», pravaachoŭniki ŭžyli vadamiot suprać pieršych šerahaŭ mitynhoŭcaŭ. Paśla pačatku pracy śpiectechniki ludzi adyšli ad kardonu, adnak usio jašče zastajucca na vulicy.
U adkaz na pracu vadamiota ludzi pačali skandavać «Vadochryšča!».
Paśla taho, jak pratestoŭcy adyšli ad kardonu, vadamiot pierastaŭ pracavać, adnak pravaachoŭniki kidajuć śvietłašumavyja hranaty i ŭžyvajuć ślozaciečny haz.
Radykały ŭ maskach bjuć u barabany. Supraćstajańnie praciahvajecca.
Zaraz na vulicy ŭ Kijevie minus 7 hradusaŭ pa Celsii.
20:02
Ekskluziŭny fotarepartaž «Našaj Nivy» z Kijeva
Mitynhoŭcy z Majdanu rušyli na šturm uradavaha kvartała. Lidara apazicyi Vitala Kličko, jaki sprabavaŭ spynić ich, ablili z ahniahaśnika. Ludzi abvinavačvajuć prezidenta Janukoviča ŭ parušeńni Kanstytucyi i zdradzie nacyjanalnych intaresaŭ. Jany patrabujuć revalucyi.
U Kijevie iduć intensiŭnyja sutyčki miž demanstrantami i śpiecnazam. Uvieś čas čuvać streły hranat sa ślezaciečnym hazam. Padpleny aŭtobus. Samaja haračaja situacyja skłałasia na vulicy Hrušeŭskaha i kala Respublikanskaha stadyjona.
fota z žž Rustema Adahamava
19:34
Kličko źviartajecca z trybuny Majdana. Jon zaklikaje kiraŭnictva Ukrainy spynić procistajańnie milicyi suprać svajho narodu, milicyju zaklikaje pierachodzić na bok naroda.
18:37
Na vulicu Hrušeŭskuju ŭ Kijevie, dzie praciahvajecca supraćstajańnie pamiž demanstrantami i milicyjaj, padahnali vadamiot.
Pra heta paviedamlaje Hromadśkie TV.
Praŭda, kijaŭlanie žartujuć, što nie treba bajacca vady, jana siońnia ŭsia śviataja (siońnia Vadochryšča).
U Kijevie prymianiajuć hranaty sa ślozaciečnym hazam, usie kašlajuć.
17:59
Mitynhoŭcy, jakija sprabujuć prarvać kardon unutranych vojskaŭ na vulicy Hrušeŭskaha ŭ Kijevie, raźbili dva milicejskija aŭtobusy. Zaraz mitynhoŭcy sprabujuć prarvać kardon z boku alei, jakaja viadzie ŭ Maryinski park.
Radykalna nastrojenyja maładyja ludzi padpalili milicejski aŭtobus, pryparkavany la ŭvachodu na stadyjon «Dynama». Z pačatku ŭ jaho raźbili šyby, a zatym padpalili.
U toj ža čas, jak stała viadoma UNIAN, bojku ź milicyjaj ździejśnili maładyja, jakija pazicyjanujuć siabie jak arhanizacyja «Pravaje kryło».
Pastupova raźbirajuć brukavanku.
17:36
U Kijevie na vulicy Hrušeŭskaha mitynhoŭcy zachapili adzin ź milicejskich aŭtobusaŭ.
Jany zaviali aŭtobus i sprabujuć pasunuć im kardon unutranych vojskaŭ, jaki pieraharadziŭ prajezd va ŭradavy kvartał.
Inšy aŭtobus, jakim pierakryta vuł. Hrušeŭskaha, mitynhoŭcy praciahvajuć hajdać.
Z boku Doma ŭrada i Viarchoŭnaj Rady, uzdoŭž prajeznaj častki padjechali niekalki dziesiatkaŭ aŭtobusaŭ ź milicyjaj.
17:14
Ludziej da Uradavaha kvartała prybyvaje. Asnoŭnyja sutyčki kala stadyjona «Dynama». Razam z tym, zaznačaje Hromad́skie TV, pastajanna čujecca rasijskaja mova, praŭda, im zaŭvažajuć, što hety kryčałki futbolnych fanataŭ. Interniet-tranślacyja pastajanna viśnie.
Kala stadyjona «Dynama», na rahu vulicy Hrušeŭskaha i Parkavaj alei, adnavilisia sutyknieńni pamiž mitynhoŭcami i milicyjaj.
Mitynhary zakidali milicyju pietardami i dymavymi šaškami. U adkaz milicyja ŭžyła hranaty sa ślozaciečnym hazam.
Častka mitynhoŭcaŭ adyšła, inšaja, apranutaja ŭ supraćhaźniki, zastajecca. U adnym ź milicejskich aŭtobusaŭ raźbity šyby.
16:55
Na vulicy Hrušeŭskaha ŭ Kijevie, jakaja pierakrytaja kardonam unutranych vojskaŭ, sabrałasia niekalki tysiač mitynhoŭcaŭ ź Jeŭramajdanu, jakija sprabujuć prarvacca da Uradavaha kvartała.
Kardon UV značna ŭmacavany. Mitynhoŭcy ŭžo kala hadziny sprabujuć prajści da Maryinskaha parku i pad Viarchoŭnuju Radu, jak płanavali arhanizatary Aŭtamajdanu.
Nie atrymaŭšy dazvołu prajści, jany pačali hajdać techniku, jakoj pierakryty prajezd i adciahnuli aŭtobus unutranych vojskaŭ.
Narod skanduje «Bandu heć! Hańba, hańba!».
Krychu paźniej mitynhoŭcy pajšli ŭ novy nastup. Zaraz na ŭvachodzie ŭ Maryinski park razdajucca streły i vybuchi, terytoryja trochi zadymlena.
Nieviadomyja ŭ aranžavych kaskach, jakija byli ŭ natoŭpie aktyvistaŭ, pačali bić pałkami kardon achovy. Kidajuć dymavyja šaški, čujucca streły.
Na miescy prysutničaje Vital Kličko, jaki sprabuje ścišyć bojku, staŭšy pamim UV i mitynhoŭcami, jamu dastałasia. Na jaho raspylili ahnietušyciel.
«Toje, što vy zaraz robicie, heta vialikaja niebiaśpieka», - zajaviŭ Kličko, źviartajučysia da mitynhoŭcaŭ.
***
Ukrainskaja apazicyja abviaściła pra namier stvaryć alternatyŭny ŭrad i pravieści daterminovyja prezidenckija vybary. Pra heta sa sceny na Majdanie Niezaležnaści ŭ Kijevie padčas Narodnaha vieča zajaviŭ siońnia, 19 studzienia, lidar «Udara» Vital Kličko.
Tut i dalej — foty Rojterz.
Fota ŭkrainskaj słužby Radyjo Svaboda
Na Narodnaje vieča ŭ Kijevie, vośmaje z pačatku pratestaŭ (prachodzić u niadzieli), sabrałasia da 500 tysiač čałaviek.
Darečy, zaraz u Kijevie minus 6, pakazvajuć interniet-prahnozy nadvorja.
«My abviaščajem daterminovyja prezidenckija vybary. Pra heta jašče budzie hałasavańnie, my jaho praviadziem», — zajaviŭ jon.
Taksama Kličko zajaviŭ, što «my zazirniem da prezidenta i pastavim jamu ultymatum: jon nas budzie čuć ci nie? Užo 2 miesiacy staić Majdan, a jon robić vyhlad, što jaho nie isnuje».
«Siońnia pytańnie — pieramoža Janukovič abo Ukraina?, — źviarnuŭsia Kličko da Jeŭramajdanu. — Ukraina pieramoža! Janukovič z kupkaj ludziej sabralisia pryvatyzavać krainu. Hetaha nie budzie», — zajaviŭ jon.
Taksama jon źviarnuŭsia da pravaachoŭnikaŭ: «Pierachodzicie na bok ludziej. Vy dali prysiahu, u pieršuju čarhu — narodu i vy pavinny jaho abaraniać».
Taksama na Narodnym vieča arhanizatar Aŭtamajdanu Dźmitryj Bułataŭ zaklikaŭ apazicyju vyznačycca z adzinym lidaram.
«Heta ŭžo nie tancy na płoščy, a hramadski supraciŭ. U nas bolš niama času, pakul vy damoviciesia ab raźmierkavańni pasad. U nas siońnia apošni šaniec abaranić siabie, nam patrebny lidar supracivu, jaki voźmie na siabie adkaznaść».
«Raniej Aŭtamajdan zaklikaŭ apazicyju vyznačycca z adzinym kandydatam. Zaraz heta ŭžo nieaktualna — užo zrazumieła, što nijakich sumlennych vybaraŭ praz hod nie budzie i ŭ 2015-m pryznačać taho samaha zeka», — adznačyŭ Bułataŭ.
«Tamu my prosim vas nazvać imia adzinaha lidara supracivu», — zajaviŭ jon.
Udzielniki Jeŭramajdanu na płoščy pierad scenaj padtrymali jaho zvarot, skandujučy «Lidara!».
Płan dziejańniaŭ apazicyi: Narodnaja Rada deputataŭ, adstaŭka Janukoviča i novaja Kanstytucyja
Płan dziejańniaŭ ad apazicyi składajecca z troch punktaŭ — stvareńnie Narodnaj rady, vykazvańnie niedavieru i adstaŭki Viktara Janukoviča i stvareńnie novaj Kanstytucyi. Pra heta padčas Narodnaha vieča na Majdanie Niezaležnaści zajaviŭ lidar frakcyi «Baćkaŭščyna» Arsień Jacaniuk.
«Pavinny stvaryć Narodnuju Radu ź liku narodnych deputataŭ. Tamu pieršaje rašeńnie —stvareńnie takoj Rady. Padtrymlivajecca?», — spytaŭ Jacaniuk u prysutnych na Jeŭramajdanie. «Tak!», — zajavili ŭdzielniki akcyi.
«Druhoje — Narodnaja Rada atrymaje lehitymnaść ad ukrainskaha naroda. Druhoje — paćvierdžańnie paŭnamoctvaŭ Narodnaj Rady. Treciaje — farmiravańnie novaj Kanstytucyi. My pačynajem narodnaje hałasavańnie pra niedavier i adstaŭku Janukoviča», — zajaviŭ Jacaniuk.
«Ni razu narod nie pisaŭ svaju Kanstytucyju. My abjaŭlajem pra pačatak Kanstytucyjnaha schodu. Narod pačynaje pisać svaju Kanstytucyju», — dadaŭ jon.
Akramia taho Jacaniuk zajaviŭ, što ŭ Kijevie da hetaha času niama lehitymnaj ułady. «Pačynajem narodnaje hałasavańnie ab abrańni Kijeŭharrady i mera Kijeva. Ułada — narodu!», — zajaviŭ Jacaniuk.
Taksama jon źviarnuŭsia da ŭsich orhanaŭ miascovaha samakiravańnia z zaklikam stvaryć atrady narodnaj samaabarony, zmahacca sa złačynnaściu i karupcyjaj na miescach.
«Paśla stvareńnia Narodnaj rady Ukrainy pavinien być stvorany Narodny ŭrad, jaki pryviadzie Ukrainu ŭ ES, spynić dyktaturu Janukoviča i budzie uradam jeŭrapiejskaj Ukrainy. Taki naš płan dziejańniaŭ», - padsumavaŭ Jacaniuk.
