Baćki 25-hadovaj Julii Kubaravaj, jakaja pamierła paśla apieracyi rynapłastyki ŭ «Ekamiedservisie», pavialičyli sumu materyjalnaha pazovu da miedycynskaha centra amal u čatyry razy. Novuju sumu nazvaŭ 24 studzienia ŭ sudzie Kastryčnickaha rajona Minska baćka Julii.
Nahadajem, raniej hramadzianskija istcy, jakimi sudom pryznanyja baćka i maci zahinułaj, sumiesna vystavili «Ekamiedservisu» iski ab kampiensacyi maralnaha i materyjalnaha ŭronu na sumu 10 miljardaŭ rubloŭ i 20 miljonaŭ rubloŭ. Apošniaja suma składvałasia z koštu apieracyi ŭ miedcentry (15 miljonaŭ rubloŭ) i pasłuh pa pachavańni (5 miljonaŭ rubloŭ). Z hetaj sumaj 23 studzienia pradstaŭnik adkazčyka pahadziŭsia. A sumu kampiensacyi maralnaha ŭronu pakinuŭ na mierkavańnie suda.
Jak paviedamiŭ BiełaPAN Juryj Kubaraŭ, paśla taho, jak napiaredadni ŭ sudzie ŭ jaho pacikavilisia najaŭnaściu dakumientalnaha paćviardžeńnia paniesienych raschodaŭ, jon pierahledzieŭ usie čeki, što mielisia ŭ jaho. Atrymałasia, što ŭsiaho rytualnyja pasłuhi ŭ Minsku i Hrodnie, źviazanyja ŭ tym liku ź pieravozkaj dački ŭ Hrodna, kuplaj šlubnaj sukienki koštam ziamli i h.d., abyšlisia baćkam zahinułaj u 14 miljonaŭ rubloŭ. Da hetaj sumy siamja dabaviła jašče 45 miljonaŭ rubloŭ za pasłuhi advakataŭ.
Pavodle słoŭ Juryja Kubarava, i z hetaj sumaj pradstaŭnik «Ekamiedservisa» pahadziŭsia, a sumu maralnaha ŭronu znoŭ pakinuŭ na mierkavańnie suda.
