Viarchoŭny sud nie zadavoliŭ patrabavańniaŭ spadara Bielakova, ułaśnika firmy «BIEŁSATplus». Biźniesoŭca damahaŭsia zabarony na vykarystańnie tavarnaha znaku «Biełsat TV» («Belsat TV») našym telekanałam.
Kalehija intelektualnaj ułasnaści Viarchoŭnaha suda adkinuła patrabavańni spadara Bielakova, paličyŭšy ich nieabhruntavanymi. «Tyja arhumienty, dokazy, što pazoŭnik pradstaviŭ u sudzie, nie adpaviadali farmalnym patrabavańniam, tamu sud pryniaŭ takoje rašeńnie, – zaznačaje aficyjny pradstaŭnik «Biełsatu» ŭ Biełarusi Michaś Jančuk. – Hetaje rašeńnie moža być jašče abskardžanaje ŭ paradku nahladu ciaham troch hadoŭ. Ale što dla nas važna – pavodle biełaruskaha zakanadaŭstva takaja ž samaja sprava z takimi ž samymi bakami bolš nie moža razhladacca ŭ biełaruskim sudzie. Heta značyć, što spadar Bielakoŭ nie zmoža padać suprać nas taki samy pazoŭ druhi raz».
Firma spadara Bielakova pad nazvaju «BIEŁSATplus» zajmajecca prodažam abstalavańnia dla pryjomu spadarožnikavaha i kabielnaha telebačańnia dy radyjotechničnaha abstalavańnia. Pieršapačatkovym patrabavańniem spadara Bielakova ź firmy «BIEŁSATplus» było prypynić tranśmisiju sihnału telebačańnia «Biełsat» apieratarami spadarožnika «Astra». Adnak paśla pieršaha pasiedžańnia pazoŭnik źmianiŭ patrabavańni i žadaje tolki prypynieńnia vykarystańnia tavarnaha znaku «Biełsat TV» («Belsat TV»).
Pavodle zakanadaŭstva, nielha błakavać tavarny znak, kali jaho vykarystoŭvajuć u inšaj halinie (tranślacyja i pradukcyja televizijnych prahramaŭ). Firma «BIEŁSATplus» nie ažyćciaŭlaje televizijnaj tranślacyi.
Telekanał zarehistravany ŭ Polščy, taksama, jak i damien sajtu. Damiennaje imia nie zarehistravanaje ŭ Biełarusi i nie administrujecca, a telebačańnie nie tranślujecca z terytoryi Biełarusi. Adpaviedna, i tavarny znak nie padpadaje pad jurysdykcyju biełaruskaha prava.
