Zimovy etap zdymak «nacyjanalnaha kinaprajekta» «Aviel», jaki stvaraje biełaruskaja kinakampanija «Nonstop Miedyja» ŭ supracoŭnictvie z ZŠA, Hiermanijaj i Rasijaj, pačniecca 28 studzienia, paviedamiŭ pradziusier kampanii Juryj Ihruša.
U filmie buduć prysutničać epizody, dziejańni jakich razhortvajucca na fonie masavaj demanstracyi ŭ Minsku paśla prezidenckich vybaraŭ 19 śniežnia 2010 hoda. Hety fakt u minułym hodzie daŭ padstavu internet-supolnaści nazvać «Aviel» svojeasablivym adkazam na film «Žyvie Biełaruś» Kšyštafa Łukaševiča pa scenary apazicyjnaha aktyvista Franaka Viačorki.
Praca nad hetymi epizodami zapłanavana na 30 studzienia — 2 lutaha. Zdymki buduć vieścisia na praśpiekcie Niezaležnaści, pačynajučy ad Kastryčnickaj płoščy i da płoščy Niezaležnaści, pieravažna ŭviečary i ŭnačy. Tak, u pieršyja dva zdymačnyja dni na placoŭcy zadziejničajuć 500 čałaviek, a ŭ astatnija dni - da 4 tysiač čałaviek.
«Jak i kožnaja zdymačnaja hrupa, my źviartajemsia da Słužby biaśpieki prezidenta, raśpisvajem, dzie i što budzie adbyvacca, i atrymlivajem dazvoł, — rastłumačyŭ Ihruša. — Nam vydzialajecca dapamoha i padtrymka MUS, ruch budzie rehulavać DAI, ale nijakich turnikietaŭ nie praduhledžana».
Pavodle jaho słoŭ, usio, što adbyvajecca na zdymačnaj placoŭcy, budzie «u ramkach zakona», tamu, kali chtości pasprabuje jaho pierastupić, u adnosinach da parušalnika «buduć prymacca miery».
«Kali na zdymačnuju placoŭku pryjduć chulihany i pačnuć rabić pravakacyi, to, naturalna, budzie vyklikanaja milicyja, jak heta zrabiła b lubaja zdymačnaja hrupa — biełaruskaja, rasijskaja ci amierykanskaja, zakon jość zakon», — papiaredziŭ pradziusier kampanii.
