Alimpijskija hulni intryhujuć tym, chto z suśvietnych lidaraŭ pryjedzie ŭ Krasnadarski kraj, a chto prabajkatuje. Barak Abama, Anhieła Mierkiel, Fransua Ałand, Devid Kemieran, Dala Hrybaŭskajcie nie pryjeduć na Hulni. Zatoje budzie Alaksandr Łukašenka, jakoha dva hady tamu nie paklikali ŭ Łondan, i Viktar Janukovič.
Rasijskija ŚMI sprabujuć padać, što bajkot suśvietnymi lidarami Alimpijady prachodzić praz toje, što ŭ Rasii zabaronienyja «adnapołyja šluby». Zvykły pieravod strełak! Toje samaje, naprykład, robić Łukašenka, kali kaža, što Jeŭropa patrabuje ad Biełarusi dazvołu na hiej-šeści. Hetak pryvatnymi aśpiektami zamianiajuć pytańni karupcyi, demakratyi i svabodaŭ.
Alimpijada — heta asabisty prajekt Pucina. Uvieś čas kiravańnia hetaha čałavieka prajšoŭ pad słovami «Rasija ŭstaje z kalen». U Sočy heta pavinna być zamacavana aficyjna — ustała. Pucinu hetaha vielmi b chaciełasia.
Adnak pakul paviedamleńni z Sočy poŭnyja absurdu. Jak tyja dva ŭnitazy bieź pieraharodak, što tak naśmiašyli i napałochali śviet.
Hetaja Alimpijada budzie samaj darahoj u historyi čałaviectva. Navat letnija Alimpijskija Hulni ŭ Piekinie abyšlisia tańniej. A paraŭnoŭvać ź inšymi Zimovymi hulniami ŭvohule nie vypadaje. Ahułam na Sočy patracili kala 50 miljardaŭ dalaraŭ. Fantastyčnyja hrošy.
A jašče prahrymieŭ «vydatny» parol da sočynskaha «vaj-faja» — «berlin1936». Heta ŭ 1936 hodzie Alimpijadu ŭ Bierlinie adčyniaŭ Adolf Hitler.
«Sočy — horad duchoŭnaści i dabra! Takim słohanam sustreŭ nas horad! Za dva dni z troch kramaŭ nas sprabavali padmanuć u troch. Na pretenzii adkazali słovami: «A što, vy dumali, u kazku patrapili?» Ceny na tavarach akazvajucca nie sapraŭdnyja, a čekavy aparat raptam łamajecca i, jak potym akazvajecca, suma prabitaha stała ŭ 10 razoŭ bolšaj, čym cana nabytaha! Dobra my, choć viedajem, jak razabracca, a voś biednyja zamiežniki, napeŭna, i nie zaŭvažać, što ich padmanuli», — tak niezadoŭha da Alimpijady apisvaje sočynskija realii biełaruskaja bijatłanistka Nadzieja Skardzina.
Druhoje važnaje pytańnie, jakoje chvaluje śviet. Ci budzie Alimpijada ŭ Sočy biaśpiečnaj, ci nie spraŭdziacca samyja čornyja prahnozy?
Biaśpieka na Alimpijadzie budzie niejmaviernaja. Znoŭku ž dachodzić da absurdu — u Alimpijskuju viosku nielha pranosić pradukty ŭ škle. Spartsmieny buduć abaviazkova prachodzić praź mietałašukalnik.
Usio ž treba skazać niekalki słovaŭ ułasna pra sport. Biełaruś na Alimpijadzie pradstavić rekordna nizkaja kolkaść atletaŭ — 27. Chakieisty padaryli pucioŭku Słavienii. Niekali biełarus Ihar Žalazoŭski braŭ srebra ŭ kańkach na Alimpijadzie ŭ Lilichamiery, a siońnia kańkabiežcy navat nie zmahli zavajavać nivodnaj licenzii. Niama našych i ŭ fihurnym katańni.
Kali kazać prosta, to naš intares zvodzicca da dvuch punktaŭ prahramy — žanočaha bijatłona i mužčynskaha frystajła (chaj prabačać inšyja ŭdzielniki biełaruskaj delehacyi).
U bijatłonie my majem unikalnuju Darju Domračavu — samu chutkuju bijatłanistku śvietu.
Kali Darja dobra adstralajecca, to miedaloŭ pavinna być mnoha. U Nadziei Skardziny — inšy plus, jana vydatny strałok, a voś biehaje jana pavalnavata. U internecie žartujuć: voś by niejak abjadnać chutkaść Domračavaj i trapnaść Skardziny. Moža, niešta i ŭdasca ŭ estafiecie.
Frystajł — heta ŭvohule biełaruski fienomien.
Niekali ŭ SSSR hety vid sportu stali raźvivać jakraz u Biełarusi, na bazie akrabatyčnaj škoły. Dziakujučy hienijalnamu trenieru Mikałaju Kazieku, pośpiechi akazalisia ašałamlalnymi. Čatyry Alimpijady zapar (!) my brali miedali ŭ hetym vidzie prahramy. Sioleta niezvyčajna mocnyja kitajcy, rasiejcy pieraciahnuli našaha Cimocha Śliŭca, ale ŭsio adno Alaksiej Hryšyn, Dźmitryj Daščynski, Anton Kušnir u liku hałoŭnych pretendentaŭ na miedali.
Biełaruskaja delehacyja ŭ Sočy
Bijatłon (10 spartsmienaŭ) —Darja Domračava, Nadzieja Skardzina, Ludmiła Kalinčyk, Nastaśsia Dubarezava, Nadzieja Pisarava; Siarhiej Novikaŭ, Jaŭhien Abramienka, Juryj Ladaŭ, Uładzimir Čapielin, Alaksandr Darožka.
Frystajł (7) —Alaksiej Hryšyn, Dźmitryj Daščynski, Anton Kušnir, Dzianis Osipaŭ; Ała Cupier, Hanna Huśkova, Volha Kapuścina.
Łyžnyja honki (6) —Siarhiej Dalidovič, Alaksandr Łazutkin, Michaił Siamionaŭ, Alaksiej Ivanoŭ; Alena Sańnikava, Valancina Kaminskaja.
Hornyja łyžy (2) —Jury Daniłačkin; Maryja Škanava.
Šort-trek (2) —Maksim Siarhiejeŭ; Volha Tałajeva.