Pa inicyjatyvie parafijan i pry padtrymcy probašča parafii Naradžeńnia Božaj Maci, a taksama pa błahasłaŭleńni dapamožnaha biskupa Pinskaj dyjacezii Kazimira Vielikasielca ŭ homielskim kaściole prachodzić biesprecedentnaja akcyja: katoliki padpisvajuć dobraachvotnuju zhodu na vykarystańnie paśla śmierci svaich unutranych orhanaŭ u transpłantałohii.
«Dareńnie svaich orhanaŭ miedycynie - heta taksama sprava lubovi da bližniaha», — adznačyŭ u suviazi z hetym probašč parafii ks. Słavamir Łaskoŭski.
«Katalicki Kaścioł zaklikaje viernikaŭ zaviaščać svaje orhany paśla śmierci balnicam dla transpłantacyi. Tamu što tak čałaviek daje žyćcio inšym ludziam.
Adnak na heta pavinna być asabistaja zhoda kožnaha čałavieka. Zakon Božy, u adroźnieńnie ad zakona dziaržavy, zahadvaje vykarystoŭvać orhany dla pierasadki tolki tych ludziej, jakija papiarednie dali svaju zhodu na heta. My dekłarujem hetuju zhodu dla čyścini svajho sumleńnia», - dadaŭ vikaryj parafii ks. Daminik Šymanski.
Akcyju vitaje kiraŭnik RNPC «Transpłantacyi orhanaŭ i tkanak», hałoŭny pazaštatny transpłantołah Ministerstva achovy zdaroŭja Biełarusi Aleh Rumo:»Nam vielmi pryjemna, što vierniki nas padtrymlivajuć.
Tak, ź jurydyčnaha punktu hledžańnia, takija zajavy nie majuć siły, pakolki pa biełaruskich zakonach miedyki kirujucca prezumpcyjaj zhody. Heta značyć, uračy vykarystoŭvajuć orhany pamierłych ludziej bieź jaho zaviaščańnia abo zhody svajakoŭ.
Kali ž čałaviek pryncypova nie choča, kab jaho orhany ŭ vypadku śmierci mahli pierasadzić inšamu, jon maje prava napisać zajavu pa miescy žycharstva,iaho dadzienyja zaniasuć u ahulny rejestr. Ale akcyja, jakuju vy pravodzicie, pakazvaje, što nie nam, miedykam, patrebnyja orhany, a ciažka chvorym ludziam, jakich možna vyratavać tolki dziakujučy transpłantacyi».
